"Багануурын уурхайн ажилчид метилийн спиртэд хордож нас барсан байж болзошгүй"

Багануурын уурхайн хоёр ажилтан метилийн спиртэд хордож нас барсан байж болзошгүй байна. Тодруулбал, Цагдаагийн байгууллагад энэ сарын 28-ны өдрийн 13.00 цагийн орчимд Багануур дүүргийн 1 дүгээр хороо Эрүүл мэндийн төвд хордлогод орсон байж болзошгүй хоёр хүн ирээд нэг иргэн нь нас барсан гэх дуудлага мэдээлэл бүртгэгдсэн юм. Үүнтэй холбогдуулан Эрүүл мэндийн яамнаас дараах анхааруулгыг гаргав.

ЭМЯ-ны Нийгмийн эрүүл мэндийн бодлогын газрын дарга Л.Баттөр:
-Нийслэлийн Багануур дүүрэгт шалтгаан тодорхойгүй хордлогод зургаан хүн өртөж, хоёр хүн нас барсан байна. Тархвар судлалын асуумжаар метилийн спирт уусан байж болзошгүй бөгөөд өртсөн дөрвөн хүнээс нэг хүн Багануур дүүргийн ЭМТ-ийн сэхээнд, гурван хүн эмнэлэгт хэвтэн эмчлэгдэж байна. Нийгмийн эрүүл мэндийн үндэсний төв, Багануур дүүрэг хамтран эрсдэлийн үнэлгээ хийхэд ДУНД зэргийн эрсдэлтэй гарсан. Нийслэлийн Эрүүл мэндийн хяналтын газраас таван хүний бүрэлдэхүүнтэй баг ажиллаж байна.

Иймд иргэд олон нийтийг архи тамхи зэрэг хорт зуршлуудаас зайлсхийхийг анхааруулж байна. Учир нь архи, спиртэд хордож нас барсан тохиолдол сүүлийн жилүүдэд нэмэгдсэн. Тухайлбал, 2020 онд 650 тохиолдол байсан бол 2022 онд 1071 болж нэмэгджээ.