Телеграм залилангийн хохирогч иргэд нийт 10 гаруй тэрбум төгрөгөөр хохирчээ

  Телеграм нь 2013 онд үүсгэн байгуулагдаж, дэлхий даяар 950 сая гаруй хэрэглэгчтэй харилцааны программ юм. Уг платформоор дамжуулан залилах, секс сүрдүүлэг, хуурамч зар, хортой холбоос ашиглан мэдээлэл хулгайлах зэрэг гэмт хэргүүд түгээмэл үйлдэгдэж байна.
Гадны улсын гэмт бүлэглэлүүд цахим хэрэгсэл ашиглан үйлдэж буй залилах гэмт хэргийн нөхцөл байдлын талаар Кибер аюулгүй байдлын зөвлөл, Харилцаа холбооны зохицуулах хороо, Гэмт хэргээс урьдчилан сэргийлэх ажлыг зохицуулах зөвлөл, Цагдаагийн ерөнхий газар, Монголбанк хамтран мэдээлэл өглөө.

Энэ оны долоодугаар сараас эхлэн цагдаагийн байгууллагад “Гар утасны Телеграм аппликейшныг ашиглан “цагийн ажил буюу даалгавар биелүүлэх ажил хийж, мөнгө өсгөж өгнө” гэсэн зарын дагуу мөнгө байршуулж залилуулсан” гэх гомдол, мэдээлэл нэмэгдэж, сүүлийн дөрвөн сарын хугацаанд 619 гэмт хэрэг бүртгэгдэн, шалгагдаж байгаа иргэдэд нийт 10 гаруй тэрбум төгрөгийн хохирол учруулсан байна.
Телеграм аппликейшин ашиглан үйлдэгдэж буй залилах гэмт хэрэгт дүн шинжилгээ хийхэд хохирогчдын,
70 орчим хувь нь 25-44 насны,

• 93,8 хувь нь эрхэлсэн тодорхой ажилгүй эсвэл терийн болон хувийн байгууллагад ажил хөдөлмөр эрхлэгч бөгөөд бүрэн дундаас дээш боловсролтой,
• 67 хувь нь эмэгтэй буюу 3 хохирогч тутмын 2 нь эмэгтэй хүн эзэлж байна.

Дээрх төрлийн залилах гэмт хэрэг нь дараах үйлдлийн арга, хэлбэрээр түгээмэл үйлдэгдэж байна.

Дээрх төрлийн залилах гэмт хэрэг нь дараах үйлдлийн арга, хэлбэрээр түгээмэл үйлдэгдэж байна.

Үүнд:

Бараа худалдан авч, борлуулалт нэмэгдүүлэх даалгавар
Тик ток хаяг дагах, өгөгдсөн постод лайк дарж хандалт өсгөх даалгавар
Байгууллагын үйл ажиллагаа, бүтээгдэхүүний зар сурталчилгаанд үнэлгээ өгех Даалгавар
Өгөгдсөн дансанд мөнгө байршуулаад өсгөж авах даалгавар
Зээл олгоход шаардлагатай материал бүрдүүлэх даалгавар
Өгөгдсөн интернэт банкаар нэвтэрч гүйлгээ хийх даалгавар биелүүлэх зэрэг аргуудаар үйлдэгдэж байна.

Түүнчлэн телеграм даалгаврыг үе шатаар биелүүлэх бөгөөд дараа, дараагийн Даалгаврыг биелүүлснээр мөнгөө нэмэгдүүлж авах боломжтой гэж төөрөгдүүлдэг ба хэрэв Даалгаврыг биелүүлээгүй эсвэл дундаас нь зогсоовол систем таны цэнэглэсэн баримтыг шалгах боломжгүй бөгөөд төлбөр тооцоо, бонус мөнгө, буцаан олголт зэргийг танд өгех боломжгүй гэж шахалтад оруулдаг.
Бүртгэгдсэн дээрх төрлийн залилах гэмт хэрэгт 976 дансаар мөнгөн гүйлгээ хийгдэж, олон улсын крипто бирж, бооцоот болон мөрийтэй тоглоомын сайтуудаар дамжин гадаад улсын хяналтгүй бүс рүү шилжиж байгаа нөхцөл байдал тогтоогдсон.

Иймд иргэд үл мэдэгдэх телеграм группүүдэд элсэж, ямар ч тохиолдолд мөнгө шилжүүлэхгүй байх, хэрэв мөнгө шилжүүлсэн бол дахин давтаж шилжүүлэхгүй байх, хохирсон тохиолдолд цагдаагийн байгууллагад нэн даруй мэдэгдэхийг зөвлөж байна.