Б.Дэлгэрсайханы ашиг сонирхол нүүрсний экспортод тушаа болж байна, Ерөнхий сайд аа

Тавантолгойн нүүрсийг экспортлох гол гарц бол Ханги, Гашуунсухайтын боомт. Ялангуяа Хангийн боомтоор нүүрсний экспортыг нэмэгдүүлэх нь чухал ач холбогдолтой байгаа. Засгийн газрын зүгээс Ханги руу төмөр зам, автозамаар нүүрс тээвэрлэх хийх бодлого баримталж байгаа ч Зам тээврийн сайд Б.Дэлгэрсайхан зөвхөн өөрийн эзэмшлийн төмөр замаар Ханги руу нүүрс тээвэрлэх сонирхолтой байгаа нь ил далд цухалзаж эхэллээ.

Тодруулбал Зам тээврийн сайд Б.Дэлгэрсайхан Ханги-Мандалын чиглэлд баригдсан 472 км хатуу хучилттай автозамыг хүлээж авахгүй, тээвэр явуулахгүй царцаажээ.

Уг нь Засгийн газрын хуралдаанаар нүүрсний экспортыг нэмэгдүүлэх хүрээнд Тавантолгойн ордоос Ханги-Мандал боомт руу чиглэсэн хатуу хучилттай автозамыг богино хугацаанд ашиглалтад оруулж тээвэрлэлтийг яаралтай эхлүүлэх үүрэг чиглэлийг Зам тээврийн сайд Б.Дэлгэрсайханд өгсөн. Гэвч Зам тээврийн сайд Б.Дэлгэрсайхан шалтаг тоочиж, Ханги-Мандалын чиглэлд баригдсан хатуу хучилттай автозамыг хүлээж авахгүй байгаа аж.

Уг нь Ханги-Мандал чиглэлийн 472 км хатуу хучилттай автозамыг “Тахилт хайрхан транс” ХХК концессын гэрээгээр аль хэдийнэ барьчихжээ. Тус хатуу хучилттай автозам ашиглалтад орсноор Тавантолгойн нүүрсийг төмөр зам, автозамаар зэрэг тээвэрлэж экспортын гарц нэмэгдэх чухал ач холбогдолтой юм.

Ханги-Мандалын чиглэлд баригдсан хатуу хучилттай автозамыг Зам тээврийн яам хүлээн авахгүй байгаа цаад шалтгааныг судалбал Зам тээврийн сайд Б.Дэлгэрсайханы ашиг сонирхол хөндөгдөөд байгаа аж.

Учгийг тайлбал Зам тээврийн сайд Б.Дэлгэрсайхан Зүүнбаян-Ханги чиглэлийн 226.9 км төмөр замыг өөрийн хамаарал бүхий “Монголиан транс ложистик” ХХК-иараа концессын гэрээ байгуулан барьж ашиглалтад оруулжээ. Өөрөөр хэлбэл Ханги чиглэлийн төмөр замаар тээвэрлэж байгаа ачаа бүрээс Б.Дэлгэрсайхан ашиг хүртдэг гэсэн үг.

Тэгэхээр Ханги-Мандал чиглэлд баригдсан хатуу хучилттай 472 км автозамыг хүлээгээд авчихвал Б.Дэлгэрсайханд ашиггүй, түүний тээврийн монополь эрх үгүй болж, олох орлого багасах учраас хүлээж авахгүй байгаа гэх локиг гарч ирж байна.

Уг нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль гэж бий. Энэ хуулийг энгийнээр маш ойлгомжтой тайлбарлавал хувьдаа төмөр замтай, тэр ч бүү хэл улсаасаа олон вагонтай Б.Дэлгэрсайхан шиг хүнийг Зам тээврийн сайдаар ажиллахыг хориглосон хууль. Гэвч Б.Дэлгэрсайханд энэ хууль огт хамаагүй мэт аяглаж байна.