Боловсролын сайдын барцад нь гарах болоогүй юу

Боловсролын сайд Ц.Наранбаяр сайд болсноосоо хойш бусдын дайралтад өртөж буй. Тэрбээр багшлах эрхийн гэрчилгээ олгох сургалтын талаар 2024 оны есдүгээр сарын 16-нд мэдээлэл өгсөн юм. Энэ үеэр "Үнэн ба зөв" намын дарга асан А.Отгонбаатар сайдын мэдээлэлд дургүйцлээ илэрхийлэн өндөг шидэж тухайн үедээ дуулиан тарьсан билээ. Гэвч азаар түүний биед хүнд гэмтэл учраагүй ч хацраа барин ёолон зогссон.

Тэгвэл түүний дараагийн сенсац нь хөмсгөндөө оёдол тавиулсан явдал боллоо. Түүнийг өнгөрсөн долоо хоногоос эхлэн УИХ-ын гишүүн Б.Найдалаатай зодолдож цагдаад дуудлага өгсөн талаар олон нийтийн сүлжээнд цацагдсан юм. Гэсэн ч тэд үүнийг үгүйсгэн санамсаргүй зүйл болсон хэмээн тайлбарлав.

Энэ талаар тэрбээр "Б.Найдалаа гишүүнтэй харилцан зодолдоогүй. Санамсаргүй болсон зүйл. Эмнэлэгт очиж хоёр жижигхэн оёдол тавиулсан. Цагдаагийн байгууллагад дуудлага өгөөгүй" гэсэн юм.

Харин УИХ-ын гишүүн Б.Найдалаа, "Сошиалаар гараад байгаа шиг зодоон болоогүй. Харин ажил хэргийн шалтгаанаар бага зэрэг маргалдсан. Хүмүүсийн бодоод байгаа шиг архи дарс уугаад зодолдсон юм байхгүй. Дөрөв дэх өдрийн өглөө манай зөвлөлийн байдаг л нэг ажил хэрэгч хурал болсон. Тэр үеэр санамсаргүй тохиолдол болоод П.Наранбаяр сайдын хөмсөг нь гэмтчихсэн. Би цохиогүй. Санаандгүй нүд рүү нь хуруугаа хийчихдэг шиг л юм болсон. П.Наранбаяр сайд бид хоёр зодолдоод байхаар ч хүмүүс биш...” хэмээв.

Үүнээс харахад П.Наранбаяр сайд эр хүн шиг зан гаргав уу, аль эсвэл Б.Найдалаа гишүүн асуудлыг хүндрүүлэхээс айсан уу ямар ч байсан зодолдоогүй хэр нь нэг нь хөмсгөндөө хоёр оёдолтой боллоо. Ийнхүү луу жилд өндөг шидүүлсэн П.Наранбаяр сайд могой жилийг ч мөн адил барцадтай эхлүүлж байна. Гэхдээ л олон нийтийг санаандгүй хэр нь яагаад хөмсгөндөө оёдол тавиулчхав гэдэг сонин асуулттай хэвээр үлдээлээ.