Г.Занданшатар: Төсвийн тухай хууль Засгийн газрын үйл ажиллагааны бодлоготой нийцэхгүй байна

ЕТГ-ын дарга Г.Занданшатар 2025 оны төсвийн тухай хуульд бүхэлд нь хориг тавьсан талаар олон нийтэд мэдээлэхдээ дараах тайлбарыг хэлсэн юм.

Тэрбээр, "Монгол Улсын Ерөнхийлөгчийн тухай хуулийн 12.8 дахь хэсгийг үндэслэн Төсвийн тухай хууль болон хамт өргөн мэдүүлсэн, холбогдуулан өргөн мэдүүлсэн хууль 
тогтоомжид бүхэлд нь хориг тавьлаа. 

Нэгдүгээрт, Гадаад зах зээлийн төлөв байдал, түүхий эдийн үнийн хэлбэлзлийг харгалзан, валютын нөөц, алдагдалгүй төсөв батлах нь зүйтэй. Олон улсын стратегийн 
нөхцөл байдал хэлбэлзэлтэй байгаагаас шалгаалж гадаад зах зээлийн нөхцөл байдал эгзэгтэй байна.  Энэ цаг үед хэмнэлттэй, алдагдалгүй, хөгжилд хөтөлсөн төсөв батлах нь иргэд, улсын ашиг сонирхолд бүрэн нийцнэ. Энэ нь эдийн засгийн боломжийг нэмэгдүүлэх,  иргэд, ААН, татвар төлөгчдийн хэвийн үйл ажиллагааг хангах баталгаа болно.

УИХ 2025 оны төсвийн төслийг батлахдаа хэмнэлттэй байх, олон нийтэд нээлттэй байх, нийтэд ойлгомжтой хүртээмжтэй байдлаар мэдээлэх, макро эдийн засгийн болон
татвартай орчныг бүрдүүлэх, инфляцыг хязгаарлахад чиглэсэн байх,  төсвийн хөрөнгийн хуваарилт нь эдийн засгийн ач холбогдолтой байх зэрэг заалтуудад нийцэхгүй байна. Мөн 2024-2028 оны үйл ажиллагааны хөтөлбөрт тусгасан төсвийн урсгал зардлын тэлэлтийг хязгаарлаж,  төсвийн алдагдал, ЗГ-ын өрийн тусгай шаардлагыг хангана гэсэн бодлогыг бодитой хэрэгжүүлж ажиллахыг Төрийн тэргүүн сануулж байна" гэлээ.

Мөн иргэд болон татвар төлөгчид, мэргэжлийн байгууллагуудын зүгээс төсвийн сахиалга батыг чангатгах, үр ашигтай хэмнэлттэй байх зарчимд нийцүүлэн, төсвийн зардлыг бууруулах, чиг үүргийн давхардлыг арилган, улс төрийн нам эвслүүд сонгуулийн амлалтуудаа биелүүлэх зэрэг санал, шүүмжлэл гарч байгаа нь зүй ёсны шаардлага гэдгийг онцоллоо.