ХАРАХ ӨНЦӨГ: “MCS” болон түүний охин компаниудаас хандив авсан УИХ-ын гишүүдийг эгүүлэн татах уу...

УИХ-ын сонгуулиар “MCS” группээс хандив авсан улс төрчдийн нэрс ил болсон. Улсын хөгжлийнхөө төлөө бус улс төрчдөд хандив өгдөг улс төрийн хүрээллийн компаниуд оршсоор байгааг “MCS” группийн улстөрчдөд өгсөн сонгуулийн хандиваас харж болно.

Сонгуулийн тухай хуулийн 56 дугаар зүйлд хандив өгөх, хүлээх авахыг хориглосон байдаг. Тухайлбал, 56.1.1-д гадаад улс буюу гадаадын байгууллага, олон улсын байгууллага, гадаадын хөрөнгө оруулалттай байгууллага, төрийн болон орон нутгийн өөрөө удирдах байгууллага хандив өгөх авахыг хоригложээ.

“Энержи ресурс” ХХК үндэсний компани биш, харин гадны хөрөнгө оруулалттай компани

“Энержи ресурс” ХХК нь 2024 оны УИХ-ын ээлжит сонгуульд нэр бүхий гишүүдэд 360 сая төгрөгийн хандив өгчээ. Харин тус компанийн охин компаниуд болох “Тавантолгой нисэх буудал” 300 сая, “Ухаа худаг ус хангамж” 260 сая, “Юнайтед пауэр”, “Тавантолгой цахилгаан станц, ус хангамж” ХХК 270 сая төгрөг тус тус хандивласан байна.

Дээрх компаниудаас хандив авсан УИХ-ын гишүүдийг жагсаавал,

-Л.Энх-Амгалан 450 сая,

-Б.Тулга 100 сая,

-Э.Болормаа 100 сая,

-Д.Ганбат 100 сая,

-Ц.Даваасүрэн 70 сая,

-Ц.Идэрбат 90 сая,

-Н.Наранбаатар 170 сая,

-Б.Пүрэвдорж 170 сая,

-Ц.Баатархүү 30 сая,

 -Н.Учрал 270 сая,

-Д.Цогтбаатар 100 сая,

-Р.Эрдэнэбүрэн 70 сая төгрөгийн хандив тус тус авчээ.

Тэгвэл дээрх гишүүдэд хандив өгсөн “Энержи ресурс” ХХК болон түүний охин компаниуд үндэсний компаниуд биш, гадны хөрөнгө оруулалттай компани болох нь улсын бүртгэлийн мэдээллээс харагдаж байна.

“Энержи ресурс” ХХК-ийн хувьцааг “Энержи ресурс корпораци” гадны хөрөнгө оруулалттай компани 100 хувь эзэмшиж байна. “Энержи ресурс корпораци” компанийн хувьцааг Люксембургийн Монголиан коал корпорэйшн 100 хувь эзэмшдэг. Люксембургийн “Монголиан коал корпорэйшн”-ы хувьцааг Хонгконг улсад бүртгэлтэй “Монголиан коал корпорэйшн лимитед” 100 хувь эзэмшдэг. Хонгконг улсад бүртгэлтэй “Монголиан коал корпорэйшн лимитед” хувьцааг Кайманы аралд бүртгэлтэй “Монголиан майнинг корпорэйшн” 100 хувь эзэмшдэг. Кайманы аралд бүртгэлтэй “Монголиан майнинг корпорэйшн”-ы толгой компани нь Керри групп.

Тэгэхээр “Энержи ресурс” болон түүний охин компаниудаас хандив авч, УИХ-д сонгогдсон гишүүд Сонгуулийн тухай хууль зөрчсөн үү гэх асуулт гарч ирж байна. Цаашлаад ХҮН намын сонгуулийн санхүүжилтын гол хандивлагч нь мөн л “MCS” рүү чиглэх аж. Улстөрчидөөс гадна улс төрийн намыг бүтнээр нь санхүүжүүлдэг ийм нэг компани байгаа нь улс төр, бизнесийн бүлэглэл оршсоор байгааг харуулж буйн илрэл билээ.