Улс төр 7 хоногийн тойм: “Амжих юм биш үү” Б.Жавхлан сайдаа

Улс Монголд минь хавар ирж, улс төр ч даргилж эхэллээ. ХҮН нам MCS группээс нэг тэрбум 45 сая төгрөгийн хандив авч сонгуульдсан асуудал ил болж, намын дарга Т.Доржханд “Биднийг нэг тэрбум доллароор ч худалдаж авч чадахгүй” хэмээн омогдов. Боловсролтой сэхээтэн залуус улс төрд орж ирэх гэж байна хэмээн пи ар хийж байсан ХҮН намынхан үнэнд гүйцэгдэж, нэг намаас санхүүжин сонгуульдсан нь шуугиан тарьж байна. ХҮН хэмээх гуравхан үсэгтэй намынхан гурван үсэгтэй компанийн “тавиул” байсан нь илчлэгдэв. Удахгүй гурван үсэгтэй газар нь шалгаж, асуудалд цэг тавих байлгүй гэх хүлээлт бий боллоо.

Ж.Батзандан энэ долоо хоногт ШИНЭ намынхаа тамга тэмдгийг Ардчилсан намд өгч, үсэрсэн цус, тасарсан махаа нийлүүлье гэх шийдвэрт хүрсэн байна. Хоёр сонгууль дараалан Ардчилсан намын авах саналыг хувааж гай тарьсан ч Л.Гантөмөр түүнийг намдаа авахаас цааргалсангүй.

МАК руу хэдэнтээ ноцож “Байранд нь тавина” хэмээн хоолой шахан чарласан Засгийн газрын БЭТ Ж.Батзанданг “Үндэсний эвсэл”-ийн тэргүүн Н.Номтойбаяр “Золбин улстөрч” хэмээн томъёолсон. Маргааш нь БЭТ Ж.Батдандангийн зуслангийн байшин галд өртөж, мань эр “Галдан шатаасан” гэх утгатай үг хэлэв. Цахилгаанаас үүдэлтэй гал алдсан байх магадлал өндөр ч БЭТ түүнийг тийм биш байгаасай гэж хүсэж байгаа нь түүний хэлсэн үгнээс харагдах юм. Улстөрчийн пи ар гэх үү, ухаан санаа нь орон гаран гүйж явсан гэж ойлгох уу, ямартай ч галд өртсөн байшингийнхаа үүдэнд цагдаа, онцгойгийнхонтой патиараа татуулахаа тэр мартсангүй.

ЗГХЭГ-ын дарга Н.Учрал экс Ерөнхийлөгч, Их хурлын гишүүн Х.Баттулгыг “Төгрөг нуурын орд”-оо төрд буцааж өг гэв. Х.Баттулгыг 250 сая ам.доллароор зарсан ордынхоо учрыг олоход долоо хоногийн хугацаа өгсөн. Түүнд одоо дөрөв хоног үлдээд байна. Х.Баттулгын охин Б.Намууныг хүн залилсан гэх асуудал энэ долоо хоногт дэгдэж, улс төр Женко-гоор амьсгалж байна гэхэд болно.

Хууль зүй, дотоод хэргийн экс сайд, УИХ-ын гишүүн Б.Энхбаяр энэ долоо хоногт Сангийн сайдыг “амлаж” аваад бут ниргэв. Гэрээсээ 7.5 тэрбум төгрөгтэй баригдсан С.Батдөлийн хувьд хүн бүр ялаа эдэлж байгаа гэж бодож байсан ч Б.Энхбаяр “Сейфээс нь 7.5 тэрбум төгрөг гарсан С.Батдөл ШШГЕГ-ын харьяа Богд уулан дахь амралтын газар ялаа эдэлж байгаа юм билээ. Мөнгө барьдаг сайд түүнтэй холбоотой. Монголд мөнгө мэддэг ганц л сайд бий. Шүүхийн шийдвэр гүйцэтгэх байгууллагын төсвийг хэн хоёр дахин нэмэв. Яагаад Сангийн сайд энэ байгууллагад ийм хайртай болчхов оо” хэмээн Сангийн сайдыг С.Батдөлтэй холбоотой болохыг нэр заагаагүй ч хүн бүр мэдэхээр шууд хэлчихсэн. Сангийн сайд Б.Жавхлан “Батдөл гэж залуу манай Дарханы хүн. Гэхдээ надтай ямар ч холбоогүй. Амжихгүй шүү, Энхбаяраа” хэмээн хэвлэлд тайлбар өгөв.

ШШГЕГ-тай холбоотой төсвийг Б.Жавхлан нэмэгдүүлж, шагналд нь Богд уулын амралтад С.Батдөлийг амрааж байгаа талаар Б.Энхбаяр ярьж, Б.Жавхлан сайд эрс үгүйсгэж байх үед санаатай ч гэмээр юм уу, огт санамсаргүйгээр ч гэх юм уу ШШГЕГ-ын дарга Б.Нандинболор Төрийн ордонд хэвлэлийнхэнтэй таарч “С.Батдөл 2023 оны арваннэгдүгээр сард манай харьяа хорих ангид хуваарилагдаж ирсэн. 2024 оны есдүгээр сарын 29-ний өдрөөс “Төр хурх”-ын амралтын газарт галчаар хоёр сар ажиллаж байгаад 409-р хорих ангид буцаж татагдсан. Тэнд ажилласан хоригдол цалин хөлс авна. Бусдад өр төлбөртэй бол өр төлбөрийг нь барагдуулах үүднээс бидний зүгээс ажлын байраар хангах үүрэгтэй” хэмээн тайлбарлаж зогсоно лээ.

Үүний дараа УИХ-ын гишүүн Б.Энхбаяр “Хоригдлыг галчаар амраасан юм байна. Жавхлан сайдын сонгуулийн ерөнхий менежер нь ямар хүн байсан бэ. Тэр хүн Батдөлтэй хамаатан байна уу, аав нь байна уу, ээж нь байна уу шалгаад үз. Батдөлийг Жавхлан авчирсан гэж улс төрийн хүрээнд ярьдаг” хэмээн мэдэгдсэний дараа Сангийн сайд Б.Жавхлан “С.Батдөл бол Дарханд төрж, өссөн яах аргагүй Дарханы залуу. Аав, ээж нь ч манай намын ахмад гишүүд. Хүүхдээ захиж байсан тал бий. Тэглээ гээд муу юм болгоныг Дарханых юм чинь гээд надтай наах гэж оролддог. Гэхдээ үр дүн гардаггүй, чаддаггүй, чадах ч үгүй” хэмээн дахин хэвлэлд ярьсан юм.

Ямартай ч улс төр энэ долоо хоногт энэ сэдвийн хүрээнд л бужигналаа. Н.Учралын Х.Баттулгад өгсөн долоо хоногийн тал нь өнгөрч байна. ХҮН нам “хойдохоо” уншуулах нь ойртож байгааг улс төрчид сануулж, Ж.Батзандан улс төрд утаа май уугиулах гэж хичээж, Сангийн сайд Б.Жавхлан УИХ-ын гишүүн Б.Энхбаярын “зуулт”-д орж, хэсэгтээ тарчлах бололтой. Сангийн сайд Б.Жавхлан амжихгүй гэж байгаа ч хууль хяналтын байгууллага ул мөрөөр нь шалгаад амжих ч юм бил үү, хэн мэдлээ. Б.Энхбаярын хувьд нэг дор бүх сумаараа галладаг улс төрч биш. Тиймээс Б.Жавхлантай холбоотой дараагийн асуудлууд ч ил болж мэдэх юм. “Амжихгүй шүү” томорч суухаар аятайхан шиг ард нь яаж гарах вэ гэдгээ л бодох ёстой юм биш үү, Б.Жавхлан сайдаа.

Б.ТЭРГЭЛ