Зөвлөөд зөвлөөд засардаггүй, ёс зүйг УЛАНДАА ГИШГЭГЧ

УИХ-ын гишүүн М.Нарантуяа-Нарагийн сошиал дахь галзуурал хэрээс хэтэрлээ. Тэрбээр иргэдээ царай зүсээр ялгаварлан гадуурхаж, хараалын үгийг хаа хамаагүй урсгаж байна. 

Тодруулбал, Иргэн Н.Амаржин өөрийн цахим хуудастаа УИХ-ын гишүүн М.Нарантуяа-Нара болон бусад хүмүүсийн зургийг оруулаад, Улсын Ерөнхий прокурорын томилгоотой холбогдуулан байр сууриа илэрхийлжээ. Харин үүнд нь УИХ-ын гишүүн М.Нарантуяа-Нара бухимдсан байгаа юм.

Ингэхдээ тухайн асуудлын талаар бус иргэн Н.Амаржинг царай зүсээр доромжилж, "Хар барзгар 00-ийн цааснаас сэжиг царайтай новш оо" хэмээгээд хараалын үгээр "бөмбөгджээ".

Монгол Улсын Үндсэн хуулийн хоёрдугаар бүлгийн 14-р зүйлийн 2-д "Хүнийг үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно" хэмээн заасан байдаг. Гэтэл эрхэм гишүүн М.Нарантуяа-Нара хуулийн төсөл боловсруулах, хууль батлах үндсэн үүрэгтээ анхаарал хандуулж ёс зүйтэй ажиллахын оронд утасны цаанаас иргэдтэйгээ маргалдаж, тэр бүү хэл арьс өнгөөр ялгаварлан, хараалын үг урсгаж сууна.

Өчигдөрхөн УИХ-ын Ёс зүй, дэгийн байнгын хорооны хуралдаанаар М.Нарантуяа-Нара гишүүнд ёс зүйн хариуцлага ногдуулах талаар хэлэлцсэн. Улмаар түүнд хариуцлага тооцохгүй өнгөрөөж, ёс зүйн харилцаандаа анхаарах талаар зөвлөгөө өгсөн байгаа юм. Гэвч эрхэм гишүүн М.Нарантуяа-Нара зөвлөгөө хүлээн авч, засардаг нэгэн биш бололтой. Түүний удаа дараа гаргаж буй ёс зүйгүй үйлдлүүд хаа хүрч зогсох бол...