Ж.Баярмаа: Гүтгэлгийн тун нь хэтэрлээ. Гэсэн ч бууж өгөхгүй, буруу зүйлийг шүүмжилсээр байна

Өнгөрөгч Баасан гарагаас эхлэн УИХ-ын гишүүн Ж.Баярмаа, Б.Мөнхсоёл нарыг тэмбүү өвчтэй гэх мэдээлэл цахим орчинд тархаад буй. 

Үүнтэй холбоотойгоор гишүүд Төрийн ордонд мэдээлэл хийлээ. 

УИХ-ын гишүүн Ж.Баярмаа "Өнгөрсөн Баасан гарагийн оройноос эхлээд Б.Мөнхсоёл гишүүн бид хоёртой холбоотой худал гүтгэлэг тарсан. Өнгөрсөн 34 жилийн түүхэнд УИХ-ын гишүүдийг тэмбүүтэй гэж гүтгэж харлуулж байсан тохиолдол байхгүй юм билээ. Бид хоёр анхных нь боллоо. Харамсалтай нь энэ бол цэвэр гүтгэлэг. Б.Мөнхсоёл гишүүн бид хоёр Интермед эмнэлэгт үзүүлээгүй, шинжилгээ өгөөгүй. Би хамгийн сүүлд хоёр жилийн өмнө дүүрэгтээ эрт илрүүлэгт орсон. Тухайн эмнэлэг ч бид хоёртой холбоотой мэдээлэл худлаа гэдгийг мэдэгдсэн. Мөн холбогдох мэргэжлийн байгууллага судалж, эвлүүлэг гэдгийг нь тогтоосон байна лээ. Хувь гишүүнийхээ хувьд үүнд эмзэглэх юм алга. Би УИХ-ын гишүүн болсноосоо хойш буруу гэж үзсэн зүйлдээ шүүмжлэлтэй хандсаар ирсэн. Засгийн газрын мөрийн хөтөлбөрөөс эхлээд намын эрх ашиг, хувь хүний эрх ашиг гэж байхгүй зөвхөн улсын эрх ашиг байна гэсэн байр сууриас хандаж ирсэн. Засгийн газрын тэргүүнийг болон төсвийг хатуу шүүмжилсэн. Үүний эцэст иймэрхүү гүтгэлэг тарааж эхэллээ. Хамгийн сүүлд тараасан тэмбүүтэй холбоотой асуудал бол хэмжээнээсээ хэтэрлээ гэж үзэж байна.

Энэ бол хувь хүмүүс рүү дайрч байна гэхээс илүү УИХ-д олон ургальч үзэл, шүүмжлэлт хандлагыг таслан зогсоох гэсэн муу арга гэж харж байна. Гишүүд үг, үзэл бодлоо илэрхийлэх бүрэн эрхтэй. Гэтэл үүнийг нь зогсоож, зоригийг нь мохоох, айлгах гэсэн башир арга явж байна. Ийм зүйлд бууж өгөхгүй. Цаашид ч буруу гэсэн зүйлдээ шүүмжлэлтэй хандсаар байх болно.

Би үүнийг төсөв нь өөрөө "тэмбүүтэй" шахуу байсныг шүүмжилсний төлөө МАН-аас явуулсан башир арга гэж бодож байна.

Үг үзэл бодлоо илэрхийлэх, шүүмжлэлтэй хандах сэтгэлгээг минь хэн ч яаж ч зогсоож чадахгүй" гэв.

УИХ-ын гишүүн Б.Мөнхсоёл "Ийм үйл явдал болсонд гүн харамсаж байна. Зөвхөн хоёр гишүүний асуудал биш. Ялангуяа шийдвэр гаргах түвшинд улс төр дэх эмэгтэйчүүдийн оролцоог хумих, зориг зүрхийг нь мохоох гэсэн арга зэм гэж харж байна. Улс төрд эргэлт буцалтгүйгээр орсон учир бид ийм увайгүй гүтгэлэг, доромжлолоос айхгүй. Улс орон, ард иргэдээ төлөөлж ардчилсан парламентад орж ирсэн үүргээ биелүүлэх ёстой. Төсөв гэдэг татвар төлж байгаа хүмүүсийн хайран хөлс, хөдөлмөр. Бидэн шиг сонгогдож гарч ирсэн гишүүд оновчтой, зөв зарцуулахын төлөө ажиллахаас аргагүй. Өнгөрсөн онтой харьцаалсан өсөлт дээр бид бүгд дуугарч байгаа. Зайлшгүй биш зардлуудаа хумихаас өөр гарцгүй. Ж.Баярмаа гишүүн үүн дээр маш идэвхтэй дуугарсан.

Улс төрд нэгэнт орсон эмэгтэйчүүд иймхэн зүйлээс айж, эмээж сонгогчдынхоо өмнө хүлээсэн үүргээсээ ухарна гэж байхгүй. Өргөсөн тангарагтаа үнэнчээр зүтгэнэ. Худал мэдээлэл тараасан иргэний хаягийг шалгуулахаар Интермед эмнэлэг цагдаагийн байгууллагад хандсан байна лээ" хэмээн хэллээ.

 

Би үүнийг МАН-аас явуулсан гэж бодож байна. Төсөв нь өөрөө тэмбүүтэй шахам