"Эрдэнэс Тавантолгой” ХК-ийн уурхайд осол гарч, 40 настай залуу амиа алдлаа

"Эрдэнэс Тавантолгой” ХК-ийн уурхайн талбайд өнөөдөр /2025.08.27/ 100 тоннын даацтай самосвал онхолдож, ноцтой осол гарч, 40 настай оператор залуу амиа алдлаа. 

Осол гарсан шалтгааныг “Эрдэнэс Тавантолгой” ХК-ийн ажилтнууд хөдөлмөрийн аюулгүй байдал, дүрэм журмыг өөрчилсөнтэй холбоотой гэж онцолж байна. Тодруулбал, жил гаруйн өмнөөс Эрдэнэс Тавантолгой ХК-ийн шөнийн ээлжийн операторууд 04:00-05:00 цагт нэг цагийн хугацаатай унтаж амардаг журамтай байсныг 30 минут болгож багасгасан аж. 

Хамгийн ноцтой нь “Эрдэнэс Тавантолгой” ХК-д онц байдал зарласан үед буюу өнөөдөр өглөө 06.00 цагийн орчимд TRX 11-47 дугаартай 100 тоннын даацтай самосвал онхолдож байгаа нь хариуцлагын тогтолцоог хөндөх болсныг сануулж байна. “Эрдэнэс Тавантолгой” ХК-д ашиглаж буй тоног төхөөрөмж, машин техникийн чанар, дугуйны чанарыг нэн яаралтай шалгахгүй бол дахин эрдэнэт хүн амиа алдаж болзошгүйг анхааруулсан дохио ч боллоо.

Хамгийн харамсалтай нь ид хийж бүтээх насан дээрээ явж буй 40 настай оператор залуу, чанаргүй муу тоног төхөөрөмж, машин техник, чанаргүй хүнд даацын машины дугуй буудсанаас болж амиа алдчихлаа гэж нутгийн иргэд ярьж байгаа аж.