Төсвийн зардлыг бууруулах шаардлагад УИХ-ын гишүүн А.Ундраа гарын үсэг зуржээ

УИХ-ын гишүүн Д.Энхтүвшин, Б.Түвшин, Ж.Баярмаа, Г.Тэмүүлэн нар өчигдөр (2024.11.04) 2025 оны төсвийн зардлыг 3.6 их наяд төгрөгөөр бууруулах шаардлагыг Ерөнхий сайдад хүргүүлж буйгаа мэдэгдсэн билээ. 

Тэднийг мэдэгдэл хийсний дараа УИХ-ын гишүүн Д.Цогтбаатар тэдэнтэй нэгдэж, шаардлагад гарын үсэг зурсан.

Харин өнөөдөр УИХ-ын гишүүн А.Ундраа мөн нэгдэж буйгаа мэдэгдэж, шаардлагад гарын үсгээ зуржээ.

Тэрбээр "УИХ дахь “Үндэсний эвсэл”-ийн гишүүд төсвийн зарлагыг бууруулахыг дэмжиж байгаа. Аравдугаар сарын 31-ний хэвлэлийн хурлаар мөн байр сууриа илэрхийлсэн" хэмээн байна.

Сануулахад, 2025 оны улсын төсвийн төсөлд урсгал зардлыг хэт өндөр дүнтэй оруулж ирсэн талаар УИХ-ын гишүүн Ж.Баярмаа "Ирэх оны төсөвт томилолт, зочны зардал гэхэд 111 тэрбум төгрөг байгаа юм. Энэ нь өмнөх оныхоос дөрөв дахин нэмэгдсэн дүн. 2020 онд 16 тэрбум төгрөгийг зарцуулдаг байсан бол өнөөдөр 111 тэрбум болчихоод байна. 

Үүнээс гадна тавилга, эд хогшил, урсгал засварт 268 орчим тэрбум төгрөгийг төсөвлөсөн. Энэ нь өмнөх оны төсвөөс 2.2 дахин нэмэгдсэн байгаа юм. Өмнө нь 100 гаруй тэрбум байсан гэсэн үг. 

Мэдээллийн технологийн үйлчилгээ гэж бий. Уг нь төрийн бүхий л байгууллага дотроо мэдээллийн технологийн алба, хэлтэстэй. Түүгээрээ үйлчилгээ үзүүлдэг. Гэтэл үүнд ирэх онд 70 гаруй  тэрбум төгрөг зарцуулахаар тусгасан байна. Энэ нь өмнөх оныхоос 3.6 дахин нэмэгдэж байгаа дүн. 

Мөн бусдаар гүйцэтгүүлсэн ажил, үйлчилгээний төлбөрт 1.9 их наяд төгрөг зарцуулна. Өмнөх оныхоос 2.5 дахин нэмэгдсэн. Хамгийн ноцтой нь үүний ард ямар ажил үйлчилгээ явагдах нь тодорхойгүй, төсөвт энэ тухай задаргаа нь огт байхгүй. 

Бараа үйлчилгээний зардал өмнөх онд 450 тэрбум байсан бол ирэх онд 960 тэрбум болж нэмэгдэж байгаа” хэмээн хэлсэн юм.