Л.Оюун-Эрдэнэ бүхнийг булаадаг ч “Харбины луйвар”-ыг булааж чадахгүй

Ерөнхий сайд асан Л.Оюун-Эрдэнийн “Өсөхийн өлөн” арилаагүй нь юу юунаас харагддаг. Хүн ямар ажил алба эрхэлж, ямар ч өндөрлөгт хүрч болно. Гагцхүү амьдрал ахуйн хэвшлээс эхлээд сэтгэхүйдээ хүртэл том өөрчлөлт хийх ёстой ч тэр Төрийн өндөр дээд сэнтийг галч, жижүүрийн пост лугаа санасан хэвээр байна. Өөрөө тэнд суугаа мэт боддог нь өлөнгөө дарах боломжийг нь хаачихсан бололтой. Тиймдээ ч тэр юу ч байсан булааж дээрэмдэх, авч өвөртлөх сэтгэлгээтэй төрийн өндөр дээд алба хашиж ирсэн нь тодорхой боллоо. 

 

Тэр ард түмэн итгэл үнэмшлээрээ нэгдсэн жагсаалыг булаана. Ахдаа төсвийн мөнгөнөөс өгөх болохоор асуудлыг нь төрийн нууцад авч байгаад хэдэн тэрбумаар нь булааж өгнө. Мега төсөл нэрээр булаана. Сүүлдээ Хянан шалгах түр хороо хүртэл булаан авах болжээ. Яг энэ цаг дор үүнийг дурдах шаардлагатай. 

 

Тухайлбал, Ерөнхийлөгч асан Х.Баттулга түүний найз Д.Баясгалан, “Бодь” группийн нүүрсний гэрээнүүдийг нууцаас гаргаж, холбогдох хүмүүс орох байх газраа олж ядаж байх шиг. Үүнийг шилийг даран, “Харбины гэрээ” гэх алдарт луйврыг ил гаргахыг шаардсан ч хараахан нууцаас гаргаагүй байна. Гэхдээ УИХ-ын гишүүн Д.Ганбат, Ж.Баярмаа нар “Харбины гэрээ”-г Хянан шалгах түр хороо байгуулах тухай мэдээлэл хийн, багаа бүрдүүлж явах зуур алдарт гэрээний гол эзэн Ерөнхий сайд асан Л.Оюун-Эрдэнэ “Эм Си Эс”-ийн мэдэлд байгаа “Ухаа худаг”-ийг шалгах Хянан шалгах түр хороо байгуулахаар өөрийн бланк дээр хүсэлт гаргаад өгчхөж. Өөрөөр хэлбэл Л.Оюун-Эрдэнэ өөрийнх нь байгуулсан нууц гэрээг шалгах хороо байгуулахаас урьтаад түр хороо байгуулчхаж байна гэсэн үг.

 

Түүний ийн өрсөхийн шалтгаан нь гэвэл хууль журамдаа “Нэг чуулганаар хоёроос илүү Түр хороо байгуулах боломжгүй” байдаг аж. Тиймээс тэр өөрийнхөө гардан хийсэн “Харбины гэрээ”-г шалгах ажиллагааг гацаах зорилгоор ийнхүү өрссөн байна.

Тодотговол, тухайн хуулийн 28.6-д “Тухайн ээлжит чуулганы хугацаанд хоёр хүртэл хянан шалгах түр хороо ажиллаж байгаа бол Монгол Улсын Үндсэн хуулийн Хорин наймдугаар зүйлийн 2 дахь хэсэгт заасны дагуу гаргасан хянан шалгах түр хороо байгуулах саналыг дараагийн ээлжит чуулганы хугацаанд хэлэлцэнэ” гэж заажээ.

“Харбины гэрээ” үнэхээр ноцтой учраас тэр энэхүү хуулийг ашиглан, бусдаас урьтаж байгаа нь өөрийгөө луйврын гэрээ хийсэн гэдгийг төвөггүйхэн хэлж байгаа хэрэг. Ерөнхийлөгч асан Н.Энхбаярын ярьж байгаагаар бол энэ гэрээ ихээхэн алдагдалтай, үүнээс үүдэж Монгол Улс 35 их наяд төгрөг алдана гэдгийг хэлж байсан.

 

Гэхдээ Л.Оюун-Эрдэнэ Засгийн газрын хэрэг эрхлэх газар, Ерөнхий сайдаар сүүлийн зургаан жил тасралтгүй ажилласан. Бидэнд нууц гэж танилцуулж хөшиг татаад байгаа луйврын гэрээнүүдийн дийлэнх нь түүнийг ийн алба хаших хугацаанд хийгдсэн гэхээр тэр өөрөө өөрийгөө хянаж шалгах гээд байгаа хэрэг үү. Ийн өөрийгөө шалгахаас гадна Ухаа худгийг шалгахаар тархи зүрхэндээ түрээсгүй амьдруулж байгаа Ц.Элбэгдорж ахыгаа яах юм. 

 

“Эм Си Эс”-гүй Ц.Элбэгдорж, Ц.Элбэгдоржгүй “Эм Си Эс” гэж хаана орших юм бэ. Өөрийнхөө луйврын гэрээг шалгуулахгүйн тулд Хянан шалгах түр хороо байгуулахаас эхлээд бүхий л зүйлийг булааж яваа Ерөнхий сайд асныг ч өөрийг нь шалгах хэрэгтэй.

 

Тэгээд ч хүссэн хүсээгүй ийм цаг үед “Харбины гэрээ”-г нууцаас гаргаж таарна. Тэгэхээр Л.Оюун-Эрдэнэ бүгдийг булаадаг ч “Харбины гэрээ”-г булааж чадахгүй л болов уу.

 

 

Их Мэдэгч