Д.Ангар, Д.Чинзориг нар иргэдийг залилан доромжилж явна

Д.Ангар хэмээх нөхөр чухам “Энхийн цагаан тагтаа” болчихсон “Эрдэнэт”-ийн уулын баяжуулах үйлдвэрийн Ерөнхий инженер Т.Батмөнхийг авлига авдаг, бусдын бараа үйлчилгээний мөнгө өгөхдөө байнга 10 хувь авдаг гээд шүүмжилж байх юм. Өөрөө чухам л тахиа гахай үржүүлж, хүнд машин механизм оруулж, ирж, улсдаа татвараа төлөөд ариун цагаахнаар хөдөлмөрлөж яваа юм байх. Ингэж худлаа ярьж суухаар Д.Ангар та бусдаас луйвардсан мөнгөө өгөөч ээ. “Өөрийн толгой дээрх тэмээг харахгүй байж, өрөөлийн толгой дээрх өвсийг харна” гэгч болж байгаа нөхрийн луйврын талаар сануулахаас өөр арга алга.

 

Д.Ангар гэгч хэн бэ

 

Д.Ангар нь Сангийн яамны Өрийн удирдлагын хэлтсийн дарга, Хөрөнгийн биржийн захирлаар тус тус ажиллаж байсан, өдгөө “Монголын санхүүгийн бирж”-ийн захирлаар ажиллаж байгаа аж. Тиймээс тэр “Малчин”, “Пракиткал даатгал”, "Монголын санхүүгийн бирж" компаниудын нэр дээр санхүүгийн луйвар хийж, иргэдийг залилж явна. Тодотговол, “Малчин” компанийн 2023 оны зургаадугаар сарын 09-нд 2023-2024 оны бизнес төлөвлөгөөг хэрэгжүүлэх, эргэлтийн хөрөнгийг санхүүжүүлэх зорилгоор иргэд, хуулийн этгээдээс 3-12 сарын хугацаатай, жилийн 16.0-21.5 хувь хүртэлх хүүтэй мөнгө зээлж, эргэлтийн хөрөнгийн санхүүжилтийг бүрдүүлэх шийдвэр гаргасан байдаг. Тус компани шийдвэрийнхээ дагуу иргэдэд өндөр хүү амлан мөнгө зээлж эхэлсэн. Гэтэл “Малчин” компани нэр бүхий иргэдээс 1.7 тэрбум төгрөг зээлж босгочхоод зээлсэн мөнгөө өгөхгүй гүрийж байгааг санхүүгийн луйвар гэж үзэхээс өөр аргагүй.

 

“Практикал даатгал” нь санхүүгийн луйврын хамжигч юм уу

 

“Малчин” компани зээлийн эргэн төлөлт компанийн нийт хөрөнгө, борлуулалтаар баталгаажсан бөгөөд зээлийн эргэн төлөлтийн эрсдэлийг “Практикал даатгал” дааж, 100 хувь нэмэлт даатгал гаргана гэсэн шийдвэрийг иргэдэд танилцуулжээ. Мөн үйлчлүүлэгчдэдээ “Малчин” компанийн зүгээс таван сая төгрөгийн санхүүжилт тутамд нэг сая төгрөгийн үнэ бүхий “Alpicool” брэндийн аяллын хөргөгч бэлэглэнэ хэмээн иргэдийг хууран татсан байна. Харин өнөөдрийг болтол иргэдээс зээлсэн мөнгөө өгөхгүй байгаагаас харвал олны дунд гайгүй нэртэй "Практикал даатгал" нь санхүүгийн луйврын хамжигч болчхож. Уг компани нь "Итгэл дүүрэн ирээдүйн төлөө хамтдаа" уриан дор бид 285 мянган харилцагчтай, бүх аймагт салбараа нээсэн, 330 суманд бие төлөөлөгчтэй хэмээн пиар хийж байгаа нь харагддаг. Гэтэл энэ олон мянган харилцагчийнхаа итгэл сэтгэл дээр дөрөөлөн бусадтай бүлэглэн залилан хийж явааг юу гэх вэ. Нөгөө талаар "Практикал даатгал" нь Банк бус санхүүгийн байгууллагатай хамтран автомашины зээл болон бусад зээл гарган, иргэдээс өндөр хүү авдаг нь санхүүгийн луйвар хэмээн шүүмжлэх ч болсон. Мөн тус компаниар "вип даатгал" хийлгэсэн жолооч машинаа мөргөлдүүлчхээд хандахад "Та манайд хурдан шуурхай хандаагүй" хэмээн мөнгө гаргаж өгөөгүй зэрэг буцаж булзсан луйвар байдгийг ч иргэд ярьдаг.

 

“Монголын санхүүгийн бирж” гэдэг нь луйвар зөвлөдөг газар юм уу

 

Богино хугацаанд өндөр хүүтэй мөнгө хадгалуулаад үнэ бүхий гарын бэлэгтэйгээр Иргэний хуулийн дагуу мөнгөө өсгөж авна хэмээн баримт нотолгоотой ярьж, шийдвэр тогтоол үзүүлэхээр иргэд үнэмшилгүй яахав. Мөн санхүүжилтийн зөвлөх компаниар Санхүүгийн бирж ажиллах бөгөөд тус компаниас санхүүжилттэй холбоотой дэлгэрэнгүй мэдээлэл, бусад тодруулга авч болно, эрсдэлийг даана гэж заажээ. Гэтэл Санхүүгийн биржээс эрсдэл дааж, мэдээлэл, тодруулга авах нь бүү хэл Д.Ангар нь иргэдээс зугтаж, тэднийг доромжилж явна.

 

Малчдын нөхөр гэх “Малчин” компани яагаад луйвар хийх болов

 

Хөдөө орон нутагт “Малчин шар” гэхээр андахгүй мэднэ. Тэгвэл хөдөө орон нутгийн иргэдийг эрчим хүчний хоёрдогч эх үүсвэрээр хангах зорилго бүхий “Малчин” компани нь 9011175136 улсын бүртгэлийн дугаартай, 2016575 регистрийн дугаартай 1994 онд байгуулагджээ. Тус компанийг Батмөнхийн Бямбасайхан, Дамбийн Чинзориг нар байгуулж, 10, 90 хувиар нь тус тус эзэмшдэг байна. Уг нь хөдөө орон нутаг, тэр тусмаа малчин түмний дунд гайгүй нэр хүндтэй байсан “Малчин” компани нь ийнхүү санхүүгийн луйвар хийж, малчдын дунд ч таагүй нэр хүндтэй болжээ. Уг нь бусдаас мөнгө луйвардахааргүй хөл дээрээ босчихсон компани байх учиртай ч сүүлийн үед бусад эх үүсвэрүүд орж ирснээр өрсөлдөгчтэй болж, бизнесийн үйл ажиллагаа, технологийн шинэчлэл хийгээгүй учраас ийнхүү орлогогүй болж, улмаар луйвар хийх болсон бололтой.

 

“Малчин” Д.Чинзориг нь мөнгө залилчхаад “Шүүхдээд” аваарай гэж басамжилдаг

 

Мөнгөө залилуулсан иргэд Д.Ангарт хандах гэхээр утсаа ч авахгүй зугтаадаг аж. Харин иргэд “Малчин” компанийн Д.Чинзоригт хандахаар “Шүүхээр заргалдаад аваарай” гэнэ, эсвэл утсаа авахгүй болохоор нь иргэд “Чи зээлсэн мөнгө өгөөч ээ” хэмээн мессеж бичихээр Д.Чинзориг эргүүлэн залгаж “Чи намайг чи гэлээ, хэн бэ чи. Тэр шүүх цагдаагаараа яваад мөнгөө аваарай” хэмээн огт тоодоггүй гэнэ. Үүнээс харвал Д.Чинзориг хэмээх нөхөрт монголын хууль үйлчилдэггүй бололтой. Малчдын дунд гайгүй нэр нь түгсэн "Малчин"-гийн Д.Чинзориг 2020 оны сонгуульд нэр дэвшихээр зэхсэн ч мандат өгчихөөр томоохон нам олдоогүй учраас өнжсөн. Сүүлдээ том намууд тоохгүй болохоор нь Шинэ намын гишүүн болж, 2024 оны УИХ-ын сонгуульд өрсөлдөхөөр зэхэж байсан ч эрүүл мэндийн байдлаас үүдэн, гадаадад эмчлүүлэх болж бас чадаагүй. Хэрэв нэр дэвшээд УИХ-д ороод ирсэн бол малчид иргэд маань нэг том луйварчинд итгэлээ өгөх байв.

 

Д.Ангарын “Монголын санхүүгийн бирж” нь санхүүгийн зуулчлал хийх эрхгүй

 

Зээлдэгчдэд мэдээлэл, зөвлөгөө өгөх зорилго бүхий "Монголын санхүүгийн бирж" нь санхүүгийн зуучлал хийх эрхтэй компани мөн үү биш үү шүүж үзэхэд эрхгүй бололтой. Учир нь албан ёсны тусгай зөвшөөрөлтэй компани нь "Новел инвестмент ҮЦК" компани байгааг эх сурвалж хэлсэн. Тэд мөнгөө зээлдүүлж байгаа иргэдэд “Манайх 100 хувийн даатгалтай, эрсдэлгүй бонд шүү” хэмээн хэлсэн ч энэ нь хууль бус байсныг иргэд мэдээлж байна. Уг нь “бонд” гэж байгаа бол Санхүүгийн зохицуулах хороонд мэдээлж бүртгүүлэх үүрэгтэй байдаг ч тэнд бүртгүүлж мэдээлсэн зүйл байхгүй аж.

 

Луйвардуулсан иргэдийн төлөөлөл Г.Э мэдээлэл өглөө

 

“Малчин” компани, Д.Ангар нарын энэхүү луйварт өртөж, хөрөнгө мөнгөөрөө хохирсон иргэд цөөнгүй байгаа. Гэхдээ энд ганцхан жишээ татъя. Иргэн Г.Э нь “Малчин” компанид 2023 оны зургаадугаар сарын 13-ны өдөр 100 сая төгрөгийг 366 хоногийн хугацаатай буюу 2024 оны зургаадугаар сарын 13-ны өдрийг дуустал зээлдүүлжээ. Гэтэл өнөөдрийг болтол мөнгийг нь өгөхгүй булзаж байна. Уг зээлийг жилийн 21.5 хувийн хүүтэй зээлсэн бөгөөд “Зээлдэгч нь хугацаандаа зээлээ төлөөгүй тохиолдолд “Малчин” компани болон “Пракиткал даатгал” компанид зээлдүүлэгчид зээл болон зээлийн хүү, алдангийг даатгалын гэрээнд заасан нөхцөлийн дагуу үл маргах журмаар төлнө” хэмээн заажээ. Харин өнөөдөр 2025 оны аравдугаар сарын 16-ны өдөр болоход төлөөгүй байна. Гэрээнд заасан хугацаанаас нэг жил гаруй хугацаа өнгөрчихсөн байхад бусдаас авсан мөнгөө төлөлгүй явна. Уг нь иргэн мөнгөө гэрээнд заасан дагуу “Малчин” компанийн “Хас” банкин дахь 500 439 4299 тоот дансанд шилжлүүлж өгснөөр гэрээг байгуулсанд тооцжээ. Иргэн харилцан тохиролцож даатгалын гэрээний хугацаанд даатгалын хамгаалалтад хамрагдсан гэдгийг баталгаажуулж, “Практикал даатгал” компанийг төлөөлж захирал Т.Уранжаргал гарын үсэг зурсан бол зээлийн гэрээнд “Малчин” компанийг төлөөлж, Гүйцэтгэх захирал Б.Бямбасайхан гарын үсэг зуржээ. Энд мөнгөө луйвардуулаад байгаа иргэдийн төлөөлөл Г.Э-гийн Д.Ангартай харилцсан цахим чатыг хавсаргав.

 

Үргэлжлэл бий …..

 

Их Мэдэгч