“Титаник”-ийн зорчигчийн алтан цаг дуудлага худалдаагаар 8.2 тэрбум төгрөгөөр зарагджээ

Титаник хөлөг онгоц живэх үед нэгэн зорчигчийн хэрэглэж байсан халаасны цаг дуудлага худалдаагаар 1.78 сая фунт стерлингээр (ойролцоогоор 8.2 тэрбум төгрөг) зарагдсан байна.

 

Британийн дуудлага худалдааны "Henry Aldridge & Son"-ын мэдээлснээр цагны анхны эзэн Исидор Страусс тухайн үед Нью-Йорк дахь Macy's их дэлгүүрийн хамтран эзэмшигч байсан бөгөөд 1912 оны 4-р сарын 14-нд эхнэр Ида Страусын хамт аялж явахдаа "Титаник" мөсөн уул мөргөж живсний улмаас осолдсон юм. Ослоос хэд хоногийн дараа Страусын цогцсыг далайгаас гаргаж, цагийг нь олжээ.

 

Энэхүү цаг нь Данийн Jules Jurgensen брэндийн 18К алтан халаасны цаг аж. Эхнэр Ида Страус 1888 онд нөхрийнхөө 43 насны төрсөн өдрийг тохиолдуулан бэлэглэсэн гэж үздэг. Цаг дээр Страусын нэрийн эхний үсгийг сийлсэн байдаг. Түүнийг осолд орох хүртлээ 20 гаруй жил хадгалжээ.

 

Осол болох үед эхнэр нь аврах завинд суухаас илүүтэй нөхөртэйгөө үхэхийг сонгосон байна. Хосуудын хайр дурлалын бэлгэдэл болсон цаг тэдэнтэй хамт живжээ. Цагийн зүү нь Титаник хөлөг онгоц живсэн цагийг харуулсан хэвээр байдаг байна. Түүний эхнэрийн цогцос хэзээ ч олдоогүй аж.