МИАТ-ыг мяаруулах захиалга буюу Б.Мөнхтамирыг чөлөөлөх явуулга идэвхжлээ

ТӨК-иуд нэг л болохгүй байна гэх ил далд шүүмжлэлийн шуурга ид тавьж байна. Монголчууд л болсон хойно нэг тал руу туйлшрамтгай. ТӨК-үүдийг онилсон санаатай санаагүй тэр шуурганд үйл ажиллагаа нь өсөн дэвжиж, үр ашиг нь сайжирч байгаа компаниудаа ч давхар онилчихсон дарга удирдлагыг нь халаа сэлгээ хийхээр ханцуй шамлан улайрч үзэгдэх. Энэ үймээн дүйвээнд өртөж золиос бологчдоос хамгийн хайран санагдаж байгаа нь МИАТ-ийн Гүйцэтгэх захирал Б.Мөнхтамир.

Түүний бүрдүүлсэн удирдлагын баг байнга алдагдалтай ажиллаж, дампуурахдаа тулж, үе үеийн Засгийн газрын толгойны өвчин болж байсан МИАТ-ыг хөл дээр нь босгосон. Цар тахлын үед хүний нутагт адлагдан айж түгшсэн хэдэн мянган монголоо төрийн далбааг тээгч МИАТ маань л очиж аварсан биш билүү. С.Бямбацогтыг ЗТХ-ийн сайдаар ажиллаж байхад Агаарын тээврийн салбарыг либералчлах бодлого хэрэгжүүлэхэд нь түүчээ нь болон зүтгэсэн нь бас л МИАТ.Тэр үед МИАТ-ийн татварын дараах цэвэр ашиг бүр 60 тэрбум төгрөг даван мандаж байв. Мартагдаад байсан орон нутгийн нислэгийг өнөөх муу МИАТ маань ашиг харахгүй  сэргээж, өтөл нялхас, өвдсөн зовсон хүмүүсийн унаа хөсөг болж нурууг нь тэнийлгэсэн. Олон улсын нислэгийн тоо давтамжаа нэмж, олон ч шинэ чиглэлийг хувийн хэвшлийн авиа компаниуддаа бойжуулж өгсөн.

Б.Мөнхтамир захирал өөрөө Олон улсын агаарын тээврийн холбооны Удирдах зөвлөлийн гишүүн болж, энэ зөвлөлд орж ажилласан анхны монгол хүн болсон. Тэнд орсны ачаар агаарын тээврийн салбарт гадныханд монжуулахгүй эрх тэгш харилцах үүдийг нээж, монголын иргэний агаарын тээвэр хурдтай хөгжих боломжийг нээсэн. Дэлхийн 120 орны 330 агаарын тээвэрлэгчийг нэгтгэсэн том холбооны Удирдах зөвлөлд монголдоо элэгтэй монгол хүн байхын нөмөр нөөлөг ганц МИАТ-аар хязгаарлагдахгүй монголын агаарын тээврийн салбарт ач тусаа өгч буй.

Энэ жил дэлхийн хамгийн хурдтай хөгжиж байгаа 10 агаарын тээврийн компанийн 7-д нь МИАТ бичигдсэн байна билээ. АНУ, Солонгос, Хятадын том компаниудын онгоцыг засаж ашиг орлогодоо нэмэрлэдэг,инженер техникийн ажилтнуудынхаа ур чадвараар бүс нутагтаа дээгүүр эрэмбэлэгддэг компани болж хөгжсөн. Гэтэл хэтэрхий сайн ажилласных нь “шагнал” болгож Б.Мөнхтамир захирлыг солих болсон гэх шум чих дэлсэв. Гэхдээ түүнийг явуулах технологи нэлээд эртнээс бэлтгэгдсэн бололтой. Тэр улс төр, бизнесийн бүлэглэл дэх олон  нөлөө бүхий нөхдийн занаанд орсон нь илт.

Олон жил хэл ам татлаж МИАТ-ийн нэр хүндийг унагааж байсан хоол үйлдвэрлэл үйлчилгээ, шатахуун нийлүүлэлтийн “архаг”-уудтай дайн зарлаж цөөнгүй өстөн цуглуулсан нь өнөөдөр түүнд гай болж байх шиг.  Сайдын шуурхай дээр салбарынхаа сайд Б.Дэлгэрсайхантай ажлын эрх ашгаас болж хэд хэдэн удаа ам мурийсан явдал нь Б.Мөнхтамирыг унагах ноцтой шалтгаан болон хувирсан бололтой. Тиймээс түүнийг хорхойтой араандаа зуусан сайд нь Засгийн хурал дээр түүнийг мотор нь эвдэрсэн онгоц оруулж ирсэн, сайдыгаа огцруулна гэж дандаа гадуур ярьж явдаг, билетийн ажилтнаараа дамжуулж онгоцны тийзийг 3 нугалж шагладаг гэхчлэн Ерөнхий сайдад “алтан хошуу” өргөжээ. Гэхдээ түүнийг ажлаас зайлуулахыг захиалагчид тун ч овжин зальтай аж.

Тэд эхлээд Б.Мөнхтамирыг нутгийн ах С.Бямбацогт нь явуулж байгаа мэтээр X-т хиамчидаар хэд хоног битүү нүдүүлэв. Энэ нь мэдээж  нөгөө нөхдөд давхар ашигтай. Салбартаа нэр хүндтэй сайн захирлыг явуулж байгаа муу нэрийг Засгийн ажлын ачааны хүндийг үүрч байгаа С.Бямбацогтод зүүлгэчихвэл хариуцсан ажлаараа тодорч чадахгүй байгаа зарим нэг  шалчгар сайдын бах нь ханана. Гэвч энэ жүжиг тун чиг үнэмшилгүй. Ядаж байхад өнөөх Б.Мөнхтамир нь Ховдын Эрдэнэбүрэнгийнх. Агаарын тээврийн сэргэлт хийхэд нь баруун гар нь болсон нутгийн дүүгээ С.Бямбацогт хамгаална уу гэхээс хэзээ ч хажиглахгүй. Өөрөө ажилсаг хүн ажил хийдэг хүнд л дуртай байдаг. Тэгэхээр Б.Мөнхтамирыг зайлуулах захиалга нэлээд холоос байж мэднэ.

Харамсалтай нь энэ бүхнээс болж Монголын төр нэг сайн СЕО-гоо хуйвалдааны эргүүлгэнд алдах нь. Гол нь энэ бүхний хохирогч нь МИАТ компани,  түүгээр үйлчлүүлэгч монголын хийгээд гадны зорчигчид л болох гээд байгаад харуусал төрнөм.       

Их Мэдэгч