UAE Airlines зарим нислэгийн чиглэлээ сэргээжээ

АНУ-Израилийн Иранд хийсэн агаарын цохилт болон Ираны хариу довтолгооноос болж Ойрхи Дорнодын агаарын орон зайг хаасан тул хэдэн зуун мянган зорчигч нисэх онгоцны буудлуудад гацсан. Үүний зэрэгцээ Арабын Нэгдсэн Эмират улсын (АНЭУ) зарим агаарын тээврийн компаниудын  агаарын орон зайн хязгаарлагдмал байдал үргэлжилж байна.

Associated Press агентлагийн мэдээлснээр, Абу Даби, Дубайд төвтэй Etihad Airways, Emirates, Fly Dubai компаниуд тус тус зарим чиглэлээ сэргээж байгаагаа мэдэгдэв.

Нислэгийн хяналтын Flightradar24 сайтын мэдээлснээр, тухайн өдөр Абу Даби нисэх онгоцны буудлаас Etihad Airways-ийн 15 нислэг хөөрсөн бөгөөд Парис, Амстердам, Лондон, Каир, Мумбай руу чиглэжээ. 

Emirates цөөн тооны зорчигчийн нислэгийг сэргээж, одоо байгаа захиалгыг нэн тэргүүнд тавина гэж мэдэгдэв. Fly Dubai мөн хязгаарлагдмал үйл ажиллагаагаа эхлүүлж, үйл ажиллагаагаа аажмаар хэвийн болгохын тулд холбогдох байгууллагуудтай хамтран ажиллахаа мэдэгдэв.

АНЭУ-ын эрх баригчид зөвхөн агаарын тээврийн компаниудаас үйл ажиллагаагаа сэргээсэн тухай шууд мэдэгдсэн зорчигчдод нисэх онгоцны буудалд очихыг зөвлөж байгаа аж.

АНУ-Израилийн Иранд хийсэн агаарын цохилтын дараа Иран, Израиль, Ойрхи Дорнодын томоохон төв нисэх онгоцны буудлууд өнгөрсөн сарын 28-наас хойш үйл ажиллагаагаа хаагаад байсан. 

Мөн нисэх онгоцны буудлын байгууламжид шууд хохирол учирсан тохиолдлууд гарсан. Абу Даби нисэх онгоцны буудалд нисгэгчгүй онгоц халдсаны улмаас хүний амь эрсэдсэн бөгөөд Дубайн олон улсын нисэх онгоцны буудал хэсэгчлэн хохирол амссан байна.

Дэлхийн өнцөг булан бүрийн засгийн газрууд иргэдээ нүүлгэн шилжүүлэхэд анхаарч байгаа бөгөөд үүнд чартер нислэгээр дамжуулан иргэдээ авч байна.