Сингапурын загвар өмсөгч Чуандо Тан 60 настай ч залуу төрхөөрөө олны анхаарлыг татаж байна

Сингапурын гэрэл зурагчин, загвар өмсөгч, жүжигчин, сошиалын нөлөө бүхий хүн Чуандо Тан гуравдугаар сарын 3-нд 60 нас хүрчээ. Тэрбээр наснаасаа илүү залуу харагддаг төрхөөрөө олон улсын анхаарлыг татаж, “нас бол тоо” гэх ойлголтыг бодитоор баталсан нэгэн билээ.

Чуандо Тан 1966 онд төрсөн бөгөөд 1980, 1990-ээд онд загварын модель мэргэжлээр карьераа эхлүүлж, Сингапурын загварын ертөнцөд танигдсан нүүр царай болсон. Олон жил камерын өмнө ажилласны дараа тэр уран бүтээлийн чиглэлээ өөрчилж, гэрэл зургийн салбарт хүч үзсэн юм.

Хамтрагчтайгаа хамтран Chuando & Frey гэрэл зургийн студийг байгуулж, улмаар Ave Management загварын агентлагийг үүсгэн байгуулсан. Мэргэжлийн гэрэл зурагчны хувьд дэлхийн одод, нэр хүндтэй загварын брэндүүдтэй хамтран ажиллаж, Азийн загварын салбарт өөрийн байр суурийг бэхжүүлжээ.

Чуандо Тан 2017 онд сошиал сүлжээнд тавигдсан өөрийн зургуудын ачаар дахин олны анхааралд өртсөн. Тухайн үед 50 гаруй настай байсан ч 20-иод насны залуу мэт харагдаж буй нь дэлхий нийтийг гайхшруулж байв. Чуандо Тан гоо сайхны мэс засал бус, зөв хооллолт, тогтмол дасгал хөдөлгөөн, эрүүл амьдралын хэв маягийг залуу төрхийнхөө нууц хэмээн онцолдог.

Мөн жүжигчний салбарт хүч сорьж, 2020 онд нээлтээ хийсэн Precious Is the Night кинонд дүр бүтээсэн нь уран бүтээлийн хүрээгээ тэлсэн алхам болсон юм.

Өдгөө 60 нас хүрсэн ч Чуандо Тан загварын ертөнцөд идэвхтэй хэвээр байж, тансаг зэрэглэлийн брэндүүдийн арга хэмжээнд оролцон, сошиал платформоор дамжуулан контент бүтээсээр байна.

Түүний түүх нь нас бол боломжийг хязгаарлах шалтаг биш, харин амьдралын туршлага, сахилга бат, тууштай байдлын илэрхийлэл гэдгийг сануулж байна.

 

Эх сурвалж: CNA