Бенжамин Нетаньяху: "Ирантай хийх дайн хүмүүсийн бодож байгаагаас ч эрт дуусна"

"Ираны агаарын довтолгооноос хамгаалах системийн 85%, баллистик пуужин харвагч төхөөрөмжийн 60%-ийг устгасан"

Израилийн Ерөнхий сайд Бенжамин Нетаньяху хэвлэлийн хурлын үеэрээ Ираны эсрэг дайнд Израиль томоохон ялалт байгуулсан гэж мэдэгдэж, Иран цөмийн түлш баяжуулах, пуужин үйлдвэрлэх боломжгүй болсон гэж мэдэгдэв.

Дайн эхэлснээс хойшхи хоёр дахь хэвлэлийн бага хурлын нээлтийн үгэндээ Ерөнхий сайд Нетаньяху "Иран цаашид уран баяжуулж чадахгүй болсон бөгөөд баллистик пуужин үйлдвэрлэх чадвараа алдсан" гэж мэдэгдэв.

Тэрбээр Ираны одоогийн байдлыг "өмнөхөөсөө илүү сул дорой" гэж үнэлж, Израилийг бүс нутгийн хэмжээнд бусад улс орноосоо давсан статустай болсон гэж үнэлсэн байна.

Өмнө нь Израилийн Агаарын цэргийн хүчин сүүлийн 18 хоногийн хугацаанд Иранд 12,000 бөмбөг хаяж, агаарын довтолгооноос хамгаалах хэрэгслийн 85%, баллистик пуужин харвагч төхөөрөмжийн 60%-ийг устгасан гэж мэдэгдсэн.

Израиль түүхэндээ анх удаа Каспийн тэнгисийн хойд эрэг дэх тэнгисийн цэргийн бааз руу цохилт өгснөөр Ираны цэргийн дэд бүтцийг бүхэлд нь сааруулсан нь анхаарал татаж байна.

Ерөнхий сайд Нетаньяху "Ирантай хийх дайн хүмүүсийн бодож байгаагаас ч эрт дуусна" гэж таамаглаж байна. Мөн Израиль АНУ-ыг Ирантай хийсэн дайнд татан оруулсан гэсэн мэдэгдлийг эрс няцааж, "хуурамч мэдээ" гэж үгүйсгэв.

Ерөнхий сайд Нетаньяху Ираны шинэ Дээд удирдагч Можтаба Хаменеигийн талаар дурдаж, "Залгамжлагчийн үүргийг гүйцэтгэх ёстой хүн одоогоор олон нийтийн өмнө гарч ирэхгүй байна" гэж хэлээд "Ираны дотоод улстөрд асар их хурцадмал байдал үүсээд байна" гэж нэмж хэлэв.