Bigbang хамтлагийн гишүүн асан TOP-ийг 20 жилийн турш үнэнчээр дэмжсэн ирсэн фен сайт хаагдаж, агентлаг нь уучлалт гуйлаа

BIGBANG хамтлагийн гишүүн асан TOP-ийг 20 жилийн турш дэмжиж ирсэн CHOIDOT фен сайт үйл ажиллагаагаа зогсоож, түүний агентлаг TOPSPOT PICTURES фенүүдээс нь уучлалт гуйжээ.

Маргаан TOP-ийг After School хамтлагийн гишүүн асан, жүжигчин Нанатай үерхэж байгаа нь аравдугаар сарын 2-нд ил болсны дараа олны анхаарлыг татсан юм. Гэвч CHOIDOT-ын мэдээлснээр, асуудлын гол нь түүний хувийн амьдрал бус, олон жилийн турш фенүүдтэйгээ хангалттай харилцаа холбоо тогтоогоогүй, уран бүтээлийнх нь талаар мэдээлэл дутмаг байсанд оршиж байжээ.

Агентлаг бямба гарагт гаргасан мэдэгдэлдээ фенүүдийнхээ сэтгэл дундуур байгааг ойлгож, цаашид тэдний санал хүсэлтийг уран бүтээлийн үйл ажиллагаа болон менежментдээ тусгахаа амласан байна.

CHOIDOT нь 2006 оны наймдугаар сарын 24-нөөс хойш TOP-ийг дэмжиж ирсэн бөгөөд хаагдаж буйгаа мэдэгдэхдээ уран бүтээлчийн сурталчилгаа, фенүүдтэй харилцах ажил зэрэг олон үүрэг сайн дурын фенүүдийн нуруун дээр ирж байсныг шүүмжилжээ.

Мөн TOP-ийн “ANOTHER DIMENSION” цомгоос санаа авч, фенүүдийн санаачилгаар зохион байгуулахаар төлөвлөсөн үзэсгэлэн бүртгэл муу байсны улмаас цуцлагдсан байна. Анх 300 орчим зочин хүлээн авахаар төлөвлөсөн ч бүртгэл хүлээгдэж байсан хэмжээндээ 25 орчим хувьд хүрч, цуцлалтуудын дараа оролцогчдын тоо 50 орчим болж буурчээ.

Үзэсгэлэн цуцлагдсан нь TOP-ийн Нанатай үерхэж буйтай холбоотой гэх таамаг гарсан ч CHOIDOT үүнийг няцааж, санхүүгийн хүндрэл болон оролцогчдын тоо цөөн байсан нь гол шалтгаан гэж тайлбарласан байна.

Фен сайт мөн агентлагийг асуудлын гол агуулгад бус, мэдэгдэлд захиалгын тоо дурдагдсанд илүү анхаарсан хэмээн шүүмжилжээ. Тэдний үзэж буйгаар, олон жилийн турш фенүүдийн үзүүлсэн хайр, дэмжлэгийг уран бүтээлчийн өөрийн хүчин чармайлт, хариуцлагын оронд тавьж болохгүй аж.

Ийнхүү TOP-ийг хоёр арван жилийн турш дэмжсэн фен сайтын хаалт нь уран бүтээлч болон шүтэн бишрэгчдийн харилцаа, агентлагийн менежментийн талаар маргаан дэгдээж, улмаар агентлагийг албан ёсоор уучлалт гуйхад хүргэсэн байна.