Ерөнхийлөгч Дональд Трампын гарын үсэгтэй шинэ мөнгөн дэвсгэртүүдийг гаргана

АНУ-ын Сангийн яам Ерөнхийлөгч Дональд Трампын гарын үсэгтэй шинэ мөнгөн дэвсгэртүүдийг гаргахаар төлөвлөж байгаагаа зарлав. Энэ нь АНУ-ын мөнгөн тэмдэгт дээр ерөнхийлөгчийн гарын үсэг анх удаа гарч байгаа явдал юм.

BBC зэрэг гадаадын хэвлэл мэдээллийн хэрэгслүүдийн мэдээлснээр , Сангийн яам энэ оны зургадугаар сараас эхлэн улс үндэстний үүсгэн байгуулагдсаны 250 жилийн ойг тэмдэглэх зорилгоор Ерөнхийлөгч Трамп болон Сангийн яамны сайд Скотт Бессантын гарын үсэгтэй 100 долларын дэвсгэрт гаргахаар төлөвлөж байгаа ажээ.

Сангийн яам мэдэгдэлдээ "Америкийн Алтан үеийн эдийн засгийн сэргэлтийн хувьд Ерөнхийлөгчийн түүхэн дэх ул мөрийг үгүйсгэх аргагүй", "Ерөнхийлөгчийн гарын үсгийг АНУ-ын мөнгөн тэмдэгт дээр сийлэх нь тохиромжтой төдийгүй байгалийн жам юм" гэжээ.

Мөн "АНУ болон Ерөнхийлөгч Трампын түүхэн ололт амжилтыг хүндэтгэх нь түүний нэрийг бичсэн АНУ-ын долларын дэвсгэртээс илүү хүчирхэг арга байхгүй" гэж мэдэгджээ.

1861 оноос хойш АНУ-ын мөнгөн тэмдэгт дээр АНУ-ын Сангийн яамны сайд болон дэд сайдын гарын үсэг байдаг.

Шинээр гаргасан мөнгөн тэмдэгтийн талаар АНУ-ын Сангийн яамны одоогийн дэд сайд Брэндон Бийч "Энэ нь Америкийн ард түмний хөгжил цэцэглэлт, хүч чадал, тууштай байдлын бэлгэдэл хэвээр байх болно" гэж мэдэгдэв.

Өнгөрсөн жил Төрийн департамент АНУ-ын Энхтайвны хүрээлэнгийн (USIP) нэрийг Дональд Трампын Энхтайвны хүрээлэн болгон өөрчилж, Вашингтон хотын Кеннеди төвийг "Трамп-Кеннедигийн төв" болгон өөрчилсөн.

Нэмж дурдахад, Ерөнхийлөгч Трампын хөрөг бүхий алтан зоосны загварыг гаргах төлөвтэй байгаа аж. Ерөнхийлөгч Трампын томилсон комисс АНУ-ын 250 жилийн ойг тэмдэглэх зорилгоор түүний хөрөг бүхий 24 каратын алтан зоос гаргахыг зөвшөөрсөн. Гэсэн хэдий ч энэхүү зоосны загварыг Сангийн яамнаас албан ёсоор батлуулах ёстой.

Ерөнхийлөгч Трамп АНУ-ын мөнгөн тэмдэгт дээр нэрээ сийлсэн нь өмнөх ерөнхийлөгчдийн өмнө нь хэрэглэж байгаагүй арга бөгөөд холбооны засгийн газарт өөрийн ул мөрөө үлдээх гэсэн оролдлого гэж тайлбарлаж байна.