Тайланд улс даяар шатахуун тасарлаа

Тайланд болон Ойрхи Дорнодоос импортолж буй эрчим хүчнээс хамааралтай олон хөрш орнууд дайны улмаас үүссэн эрчим хүчний хямралын тэргүүн эгнээнд орлоо. 

Тайландын засгийн газар 100 хоногийн нөөцтэй гэж мэдэгдэж байгаа ч тус улсын олон газарт урт дараалал үүсэж, шатахуун түгээх станцуудад "шатахуун дууссан" гэсэн бичиг наажээ.

Шатахуун хомсдолын улмаас Бангкокийн гол нисэх онгоцны буудлаас үйлчилгээ авах гэсэн ч такси байхгүй, жуулчны хөлөг онгоцнууд шатахуунгүй тул зогсож, зарим сүм хийдүүд оршуулах, чандарлах ёслолоо хийж чадахгүйд хүрчээ.

Энэ хямрал нь будаа, элсэн чихэр, лаазалсан болон боловсруулсан загас зэрэг дэлхийн хамгийн том бүтээгдэхүүн экспортлогчдын нэг болох Тайландын фермерүүд болон загасчдын хувьд томоохон саад тотгор учруулж байна. 

Фермерүүд ургац хураах машин механизмаа ажиллуулахын тулд дизель түлш авч чадахгүй байгаа бол олон загасчид ажилгүй хэвээр байна. Хэрэв засгийн газар түлшний үнийн талаар дэмжлэг үзүүлэхгүй бол олон тэрбум долларын салбар хэдхэн хоногийн дотор бүрэн зогсонги байдалд орж болзошгүй гэж загасчдын салбар анхаарууллаа.

Тайландын дизель түлшний үнэ өчигдөр буюу пүрэв гарагт засгийн газрын татаас дууссанаар литр тутамд 38.94 бат болж өссөн нь дайны өмнөх үеийн литр тутамд 29.94 батаас өссөн үзүүлэлт юм.