Японд нярай хүүхэдтэй ээжүүдэд зориулсан шөнийн кофе шоп ажиллаж эхэлжээ

Япон даяар шөнийн цагаар ажилладаг, нярай хүүхдээ асарч буй ээжүүдэд зориулсан тусгай кофе шоп олноор нээгдэж эхэлжээ. Эдгээр газрууд нь шөнө хүүхдээ тайвшруулж чадахгүй ядарсан эхчүүдэд амрах, ярилцах, сэтгэл санааны дэмжлэг авах орон зай болж байгаа аж.

“Шөнийн уйлах кафе” гэх санаа анх олон жилийн өмнө цахим комикоор олны анхааралд өртсөн бөгөөд өдгөө бодит амьдрал дээр хэрэгжиж эхэлжээ.

Хоккайдо арал дахь Мемуро хотод франц шарсан талхны жижиг дэлгүүрийг шөнийн цагаар эх, хүүхдүүдэд зориулсан үнэгүй газар болгон ажиллуулж байна. Тус газар оройны 21:00 цагаас өглөөний 06:00 цаг хүртэл нээлттэй байдаг бөгөөд хүүхдээ асарч ядарсан эхчүүдийг хүлээн авдаг аж.

Кафег 28 настай Мадока Нозава ажиллуулдаг бөгөөд өөрөө хүүхдээ асарч байхдаа ганцаардал, ядаргааг туулж байсан учир ийм орон зай хэрэгтэй гэж үзжээ.

Түүний хэлснээр, “Ээжүүд өөрсдийгөө ганцаараа биш гэдгийг мэдрээсэй гэж хүсдэг” хэмээн ярьсан байдаг. 

Кафед хүүхэд мөлхөх болон унтах зориулалтын дэвсгэр, хөхүүлэх болон живх солих хэсэг хүртэл тохижуулжээ. Мөн сайн дурын ажилтнууд эхчүүдтэй ярилцаж, хүүхдүүдийг түр харж өгдөг байна.

Ижил төстэй санаачилгууд Токушима болон Нийгата зэрэг хотуудад ч хэрэгжиж эхэлжээ. Зарим газарт хүүхэд асрах ажилтнууд ээжүүдэд богино хугацаанд амрах боломж олгодог байна.

Гэвч эдгээр кофе шоп үйл ажиллагааг тогтвортой үргэлжлүүлэхэд санхүүгийн хүндрэл тулгарч буй аж. Ихэнх нь сайн дурын ажилтан болон хандивын дэмжлэгээр ажиллаж байна.

Мэргэжилтнүүдийн үзэж буйгаар төр болон хувийн хэвшлийн байгууллагууд хамтран шөнийн цагаар хүүхэд асарч буй гэр бүлүүдэд зориулсан дэмжлэгийн тогтолцоог өргөжүүлэх шаардлагатай байгааг онцолжээ.