ДАШТ-ий үеэр Солонгос бүсгүйг онигор гэж доромжилсон Мексик залуу ажлаасаа халагджээ

Мексикийн Жалиско мужийн Геоматик болон топографийн инженерүүдийн коллежийн ерөнхийлөгч Улисес Фернандо Бернал Мирамонтес ДАШТ-ий тоглолтын үеэр солонгос иргэнийг доромжилсон гэж шүүмжлэлд өртсөн үйлдэлдээ уучлал хүсжээ.

Тэрбээр ням гарагт өөрийн цахим хуудсаар дамжуулан англи болон испани хэлээр мэдэгдэл нийтэлж, “Сүүлийн хэдэн өдрийн турш миний оролцсон нэгэн бичлэг цахим орчинд тархаж, олон төрлийн хариу үйлдэл дагууллаа. Тиймээс олон нийтээс албан ёсоор уучлал хүсэх нь зүйтэй гэж үзэж байна” хэмээн бичсэн байна.

Маргаан өнгөрсөн баасан гарагт Мексикийн Гвадалахара хотын Акрон цэнгэлдэх хүрээлэнд болсон Өмнөд Солонгос болон Чехийн шигшээ багуудын тоглолтын үеэр дэгдсэн юм. Солонгосын нэгэн YouTuber-ын Instagram-д нийтэлсэн бичлэгт Бернал үзэгчдийн суудлаас нүдээ татаж, ази хүмүүсийг онигор гэж доромжилсон утгатай дохио хийж буй нь дүрслэгджээ.

Уг бичлэг цахим орчинд өргөн тархаж, олон нийтийн зүгээс хүчтэй шүүмжлэл өрнүүлсэн байна.

Энэ асуудалтай холбоотойгоор Жалиско мужийн Геоматик болон топографийн инженерүүдийн коллежийн төлөөлөгч “The New York Post” сонинд өгсөн ярилцлагадаа Берналыг албан тушаалаас нь чөлөөлөхөөр болсон гэж мэдэгджээ.

Түүний үйлдэл нь олон улсын спортын арга хэмжээний үеэр арьс өнгө, үндэс угсаагаар ялгаварлан гадуурхсан үйлдэлд тооцогдож болзошгүй хэмээн шүүмжлэгчид үзэж байна.