Амь насаа үл хайрлан бусдыг аварсан 20 настай залуугийн харамсалтай төгсгөл

БНХАУ-ын Гуйжөү мужид 20 настай хоол хүргэлтийн ажилтан голд живж байсан аав, хүү хоёрыг аварсан ч өөрөө урсгалд автан амиа алдсан харамсалтай хэрэг гарчээ.

Орон нутгийн мэдээллээр уг явдал тавдугаар сарын 27-ны өдөр Гуйжөү мужийн Тунсин тосгоны орчмын голд болсон бөгөөд голын эрэг дээр тоглож байсан нэгэн хүү санамсаргүйгээр усанд унажээ.

Хүүг аврахаар аав нь гол руу үсэрсэн боловч хүчтэй урсгалд автаж, эцэг хүү хоёр хоёулаа аюулд орсон байна.

Энэ үеэр хүргэлтийн ажилтан Жинь Шяовү болон өөр гурван хүн гол руу орж, аав хүү хоёрыг эсэн мэнд эрэгт гаргаж чаджээ. Гэвч аврах ажиллагааны үеэр Жинь өөрөө урсгалд туугдан алга болж, хэдэн цаг үргэлжилсэн эрлийн дараа түүний цогцсыг олжээ.

Жинь Шяовүгийн үхэл ар гэр, найз нөхөд болон нутгийн иргэдийг гүн эмгэнэлд автуулсан байна. 

Ар гэрийнхний ярьснаар Жинь багаасаа гэр бүлийнхээ амьдралд туслахын тулд ажил хийж эхэлсэн бөгөөд санхүүгийн хүндрэл болон аавынх нь удаан хугацааны өвчин гэр бүлийг нь хүнд нөхцөлд оруулсан тул тэр хүргэлтийн ажил хийж, шөнө дөл хүртэл ажиллан амьдралаа залгуулдаг байжээ.

Түүний гар утсанд хадгалагдсан тэмдэглэлээс 2026 онд 20 мянган юань хуримтлуулж, аавдаа микроавтобус авч өгөх зорилготой байсан нь ил болсон байна. Мөн саяхан хуримтлуулсан мөнгөөрөө ээждээ шинэ гар утас авч өгчээ.

Олон нийтийн сүлжээнд зарим хүн түүний хийсэн үйлдэл “үнэ цэнтэй байсан уу” гэж маргаж байсан ч эгч нь “Тэр өөрөө байсан бол энэ сонголтдоо харамсахгүй байх байсан” хэмээн хариулжээ.

Жиньгийн аав ч хүүгээ багаасаа бусдад туслахдаа үргэлж бэлэн байдаг байсан гэж дурссан байна.

Орон нутгийн эрх баригчид Жинь болон бусад аврагчдыг эр зоригийн шагналд тодорхойлоод байгаа бөгөөд ар гэрийнхэнд нь шаардлагатай дэмжлэг үзүүлэхээ мэдэгджээ.

Түүнийг нутаглуулах өдөр тосгоны олон иргэн хүрэлцэн ирж, амь насаа үл хайрлан хүний амь аварсан залууд хүндэтгэл үзүүлжээ.