Венесуэлд хоёр удаагийн хүчтэй газар хөдлөлт болж, 188 хүн амиа алджээ

Венесуэлийн нийслэл Каракас хотын орчимд хүчтэй хоёр удаагийн газар хөдлөлт болж, хамгийн сүүлийн мэдээллээр 188 хүн амиа алдаж, 1500 гаруй хүн бэртэж гэмтжээ. Аврагчид нурсан барилгуудын нурангин дор амьд үлдсэн хүмүүсийг эрэн хайх ажиллагааг тасралтгүй үргэлжлүүлж байна.

АНУ-ын Геологийн албаны (USGS) мэдээлснээр эхний газар хөдлөлт 7.2 магнитудын хүчтэй байсан бол хэдхэн секундын дараа 7.5 магнитудын хоёр дахь чичирхийлэл бүртгэгджээ. Аль аль нь газрын гадаргад ойрхон болсон тул их хэмжээний эвдрэл сүйрэл дагуулжээ. 

Газар хөдлөлтийн улмаас Каракас болон далайн эргийн Ла-Гуайра хотод олон барилга нурж, нурангин дороос тусламж хүссэн хүмүүсийн дуу сонсогдож байгаа талаар албаныхан мэдээлжээ. Амиа алдагсдын тоо цаашид нэмэгдэх магадлал өндөр байгаа бөгөөд олон мянган хүн орон гэргүй болж, зарим нь эвдэрч гэмтсэн барилгадаа орохоос эмээн гудамжинд хонож байна.

Гамшиг лхагва гарагийн орон нутгийн цагаар 18:04 цагт буюу Венесуэлийн бүх нийтийн амралтын өдөр болсон нь олон хүн гэртээ байсан үетэй давхацжээ.

Венесуэлийн Үндэсний Ассамблейн ерөнхийлөгч Хорхе Родригес нас барсан хүний тоо өссөнийг мэдээлсэн бол түр Ерөнхийлөгч Делси Родригес улс даяар онц байдал зарласан байна.

Албаныхны мэдээлснээр 250 орчим барилга бүрэн болон хэсэгчлэн сүйдэж, хамгийн их хохирол Ла-Гуайра хотод учирчээ. Мөн Каракас хотын Алтамира, Лос Палос Грандес дүүргүүд хамгийн их өртсөн бүсүүдийн нэг болсон байна.

Аврах ажиллагаанд АНУ, Доминиканы Бүгд Найрамдах Улс, Сальвадор, Мексик, Катар зэрэг улс дэмжлэг үзүүлэхээ мэдэгдсэн бөгөөд АНУ 150 сая ам.долларын хүмүүнлэгийн тусламж илгээхээ зарлажээ.

USGS-ийн урьдчилсан үнэлгээгээр газар хөдлөлтийн улмаас хүний хохирол цаашид нэмэгдэх өндөр эрсдэлтэй байгаа бөгөөд нийт нас баралт 10 мянгаас давах магадлалтай гэж тооцоолжээ.

Энэ нь 1900 оноос хойш Венесуэлд бүртгэгдсэн хамгийн хүчтэй газар хөдлөлтийн нэг бөгөөд тус улсын нийслэл Каракаст 1967 онд болсон томоохон газар хөдлөлтөөс хойших хамгийн ноцтой байгалийн гамшигт тооцогдож байна.