Lisa анхны баримтат киногоо Торонтогийн олон улсын кино наадамд толилуулна

BLACKPINK хамтлагийн гишүүн, дэлхийн хэмжээний соло уран бүтээлч Lisa өөрийн амьдрал, уран бүтээлийн замналыг өгүүлэх анхны бие даасан баримтат кино болох “ALWAYS LALISA”-гаа 2026 оны Toronto International Film Festival (TIFF)-ийн хүрээнд дэлхийн анхны нээлтээ хийхээр болжээ.

97 минутын үргэлжлэх энэхүү бүтээл нь Тайландын Бурирам хотод төрж өссөн охиноос дэлхийн хамгийн нөлөө бүхий K-pop оддын нэг болсон хүртэлх Lisa-гийн амьдрал, уран бүтээлийн замналыг бодит баримт, хувийн мөчүүдээр харуулах аж.

Кинонд түүний хүүхэд нас, багаасаа бүжиг, урлагт дурласан үе, K-pop од болох мөрөөдлөө биелүүлэхээр Өмнөд Солонгосыг зорьсон түүх, улмаар BLACKPINK хамтлагийн гол бүжигчин, репперийн нэг болж дэлхийд алдаршсан замналыг өгүүлэх юм.

Үүнээс гадна 2021 онд гаргасан анхны соло цомог “LALISA”-гаас эхэлсэн шинэ үе шат, дэлхийн хөгжмийн зах зээлд өөрийн гэсэн өнгө төрхийг бүрдүүлсэн амжилт, мөн жүжигчин, дэлхийн хэмжээний брэндүүдийн элч төлөөлөгч болсон олон талт карьерыг онцлон харуулах юм байна.

Бүтээл нь зөвхөн тайзан дээрх гялалзсан дүр төрхийг бус, олон жилийн хөдөлмөр, сорилт бэрхшээл, дэлхийн хэмжээний уран бүтээлч болохын төлөөх тууштай хичээл зүтгэлийг илүү дотно өнцгөөс үзэгчдэд хүргэхээрээ онцлогтой.

“ALWAYS LALISA” баримтат киног найруулагч Sue Kim найруулсан бөгөөд киноны яриа англи, тай, солонгос хэлээр өрнөнө. Найруулагчийн хэлснээр энэхүү бүтээл нь Lisa-гийн тайзны дүр төрхийн цаана байгаа бодит хүнийг үзэгчдэд илүү ойроос танилцуулах зорилготой аж.

Дэлхийн хамгийн нэр хүндтэй кино наадмуудын нэг болох Toronto International Film Festival-ийн хөтөлбөрт багтсан нь K-pop уран бүтээлчдийн кино урлаг дахь оролцоо улам өргөжиж буйг харуулсан онцлох үйл явдал болж байна.

Одоогоор “ALWAYS LALISA” баримтат киноны дэлхий даяарх нээлтийн тов болон стриминг платформуудаар цацагдах хугацааг албан ёсоор зарлаагүй байна.