BIGBANG БНСУ-ын сансрын агентлагийн анхны хүндэт элчин сайд боллоо

Өмнөд Солонгосын K-pop-ийн алдарт BIGBANG хамтлаг тус улсын Солонгосын Агаар, Сансрын Захиргаа (KASA)-ны анхны хүндэт элчин сайдаар томилогджээ.

Энэ талаар хамтлагийн харьяалагддаг YG Entertainment наймдугаар сарын 14-нд мэдээлсэн байна. BIGBANG нь KASA-гийн олон нийттэй харилцах нүүр царай болж, байгууллагын ирээдүйн зорилго, сансар, агаарын салбарын гол бодлогыг олон нийтэд хүргэхэд оролцох юм.

Тус агентлаг 2024 онд байгуулагдсанаасаа хойш анх удаа хүндэт элчин сайд томилж байгаа нь энэ аж. BIGBANG нь KASA-гийн томоохон төслүүд, тэр дундаа Nuri пуужингийн тав дахь хөөргөлт болон сар судлах хөтөлбөртэй холбоотой олон нийтэд чиглэсэн үйл ажиллагаанд оролцохоор төлөвлөжээ.

Мөн хамтлаг KASA-гийн “Dream Capsule” олон нийтийн оролцооны төсөлд оролцоно. Уг төслөөр олон нийт болон BIGBANG-ийн V.I.P фэнүүдийн илгээсэн мессежийг цуглуулж, Nuri пуужингийн тав дахь хөөргөлтөөр сансарт хүргэхээр төлөвлөж байна.

BIGBANG-ийн хувьд энэ жил онцгой жил болж байгаа бөгөөд хамтлаг дебют хийснийхээ 20 жилийн ойг тэмдэглэж байна. Тэд наймдугаар сарын 19-нд “BiiiG” нэртэй шинэ дижитал синглээ гаргаж, улмаар “XX : COSMOS” нэртэй 2026–2027 оны дэлхийн аялан тоглолтоо эхлүүлэхээр болжээ. Аялан тоглолт наймдугаар сарын 21–23-нд БНСУ-ын Гоянг хотод болох тоглолтоор эхэлнэ.

Ийнхүү 20 жилийн ойгоо тэмдэглэж буй BIGBANG-ийн “XX : COSMOS” хэмээх сансрын сэдэвтэй аялан тоглолт, мөн KASA-гийн элчин сайдын үүрэг нь “сансар” гэх нэгэн ижил бэлгэдлээр огтлолцож байна.