Их Британийн Ерөнхий сайд Оросын ноцтой сүрдүүлэгийг үл харгалзан Украинд дэмжлэг үзүүлнэ гэв

Их Британийн Ерөнхий сайд Энди Бөрнхэм Украинд хийсэн анхны албан ёсны айлчлалынхаа үеэр Оросын талаас ирж буй ноцтой сүрдүүлэгийг үл харгалзан Украинд үзүүлэх дэмжлэгээ үргэлжлүүлж, Москвагийн эсрэг дарамтыг нэмэгдүүлэхээ мэдэгдлээ.

Тэрбээр Украины Ерөнхийлөгч Владимир Зеленскийтэй уулзаж, Их Британи, Францын санаачилгаар байгуулагдсан “Дэмжигч орнуудын эвсэл”-ийн анхны уулзалтыг Киев хотноо даргалсан байна.

Бөрнхэм АНУ-ын Конгрессыг ОХУ-д үзүүлэх эдийн засгийн дарамтыг улам нэмэгдүүлэхийг уриалаад, холбоотнууд Украины агаарын довтолгооноос хамгаалах чадавхыг бэхжүүлэхийн тулд өөрсдийн нөөцөөс зэвсэг нийлүүлэхээр ажиллаж байгааг онцолжээ.

Мөн Их Британийн Засгийн газар Францын SCALP пуужинд ашигладаг, Их Британид үйлдвэрлэсэн эд ангийн техникийн мэдээллийг Украинд өгөхөөр болсон байна. Ингэснээр Украин алсын тусгалт пуужинг дотооддоо үйлдвэрлэх боломжтой болох юм.

ОХУ-ын Кремлийн хэвлэлийн төлөөлөгч Дмитрий Песков уг шийдвэрийг шүүмжилж, Их Британи Украинд пуужингийн үйлдвэрлэлийн мэдээлэл өгснөөр энх тайван тогтоох үйл явцад “өчүүхэн ч ахиц гаргах боломжгүй” болгож байна хэмээн мэдэгджээ. Тэрбээр Оросын цэрэг пуужин үйлдвэрлэх байгууламжуудыг илрүүлж, устгахын тулд мэдээлэл цуглуулж эхэлсэн гэж анхааруулсан байна.

Үүний хариуд Бөрнхэм “Галыг хэн эхлүүлсэн бэ гэдэг нь гол асуулт” хэмээн мэдэгдэж, Украиныг хамгаалахад шаардлагатай дэмжлэгийг үргэлжлүүлнэ гэдгээ илэрхийлжээ.

Киев хотноо болсон “Дэмжигч орнуудын эвсэл”-ийн уулзалтын дараа Их Британи, Франц, Германы удирдагчид Украины агаарын довтолгооноос хамгаалах системийг яаралтай бэхжүүлэхээр тохиролцсон байна. Мөн Оросын эсрэг хориг арга хэмжээ авч, тус улсын дайны санхүүжилтийг хязгаарлах чиглэлээр үргэлжлүүлэн ажиллахаа мэдэгджээ.

Тус эвсэлд Украин зэрэг 34 улс багтдаг бөгөөд гишүүн орнуудын удирдагчид Украины тусгаар тогтнолыг дэмжих амлалтаа дахин нотолсон байна.

Үүний зэрэгцээ Европын Холбоо Украинд агаарын довтолгооноос хамгаалах чадавхыг нэмэгдүүлэхэд зориулж 6.1 тэрбум еврогийн цэргийн тусламж олгосноо мэдээлжээ.

Бөрнхэм мөн Украины тусгаар тогтнолын 35 жилийн ойд зориулсан арга хэмжээнд оролцож, Их Британийн Украинд үзүүлэх дэмжлэг “ганхахгүй” гэдгийг онцолсон байна.

Тэрбээр “Украины аюулгүй байдал бол бидний аюулгүй байдал” хэмээн мэдэгдээд, Оросын эсрэг “шударга бөгөөд урт хугацааны энх тайван” тогтоох хүртэл Украинд дэмжлэг үзүүлсээр байх болно гэжээ.

Айлчлалын үеэр Их Британи, Украин мөн цэргийн технологийн шинэ түншлэл байгуулж, Их Британийн мэргэжилтнүүдэд Украины Avengers AI Labs-ийн мэдээллийн санд нэвтрэх боломж олгохоор тохиролцсон байна. Энэхүү мэдээллийг байлдааны талбараас цуглуулсан мэдрэгч, камерын өгөгдөлд тулгуурлан хиймэл оюуны загвар хөгжүүлэхэд ашиглахаар төлөвлөжээ.

Энэ үеэр Орос, Украины хоорондын харилцан цохилт үргэлжилж, хоёр талын нөхцөл байдал хурц хэвээр байна.