Ерөнхийлөгч тэднийг харж байгаа

Хөнжилдөө хамт шургалсан МАН, АН, ХҮН намынхан улсын төсөв батлах гэж дамраараа эргэж байна. Хамтарсан Засгийн газар байгуулаад ч хашааны цаадахаа харж чадахгүй баалуулж, төсвөө энэ чигт нь зүтгүүлэх үү, ард түмнийхээ шаардлагыг хүлээж авах уу гэдэг гал хайчин дунд эргэх. 

Улсын төсөв дураараа дургидаг сайд нарын гарын салаагаар урсдаг мөнгө биш болохыг, ард түмэн хэрсүүжиж байгааг, УИХ-ын гишүүд нь нам хамааралгүй бизнесийнхэн, ард түмнийхээ талд зогсож байгааг харцгааж байна. Утаа май ихсэж Улаанбаатар сааралтаж байхад улсын төсвөө батлах гэж гишүүд нь хөгөө чирч сууна. 

Хамтарсан Засгийн газар байгуулахад нь Монгол Улсын Ерөнхийлөгч тэдэнд сануулж байсан. Тэрбээр “Өнөөдрөөс эхлэн та нарын гарт Монголын хувь заяа ирж байгаа. Та нар хариуцлагаас зугтах ямар ч эрхгүй болсон. Хариуцлагаа хамтдаа үүрнэ. Хяналтгүй амьдарна гэж байхгүй. Парламент, улс төрийн намууд, Ерөнхийлөгч хяналтаа тавина. Та нар хариуцлагатай ажиллах хэрэгтэй. Сайн сайхан бүх зүйлийг чинь дэмжинэ. Буруу зүйл хийвэл анхнаас нь хатуу хандана шүү” хэмээн анхааруулж байсан. 

Хяналтын сайд Б.Одбаяр нь хяналтгүйгээр Фукуок-т зугаалж байгааг, Ч.Номин сайд улсын төсвийг 50 сая төгрөгөөр “Тэрэлж” зочид буудалдаа хэлэлцүүлж байгааг, 18.3 тэрбумын ваучер тарааж хүүхдүүдэд үнэгүй кино үзүүлэх гэж байгааг, Сангийн сайд Б.Жавхлан улсын төсвөө хамгаалан батлуулж чадахгүй зугтаж, “Сайн мэдэхгүй байна” хэмээн эрээ цээргүй ярьж байгааг, анхнаасаа хэл ам дагуулах төсөв болсныг мэдсээр байж зүтгүүлэн оруулж ирсэнийг Ерөнхийлөгч У.Хүрэлсүх харж байгаа.

Ерөнхий сайд БНХАУ-ын Шанхай хотод айлчилж олон улсын хоригт орсон Huawei компанид улсынхаа их өгөгдлийг өгөх гэрээнд гарын үсэг зурж байгааг, араас нь Чайна энержи компанитай төмөр замын цэг холбох ажлыг эхлүүлэхийн тулд ямар ямар буулт хийж, ямар ашиг сонирхлоо алдаж байгааг, Үндэсний аюулгүй байдлаа алдах хэмжээний эрсдэл үүрч байна уу, үгүй юу гэдгийг ч харж байгаа. 

Хамтарсан Засгийн газар нэрийн дор хамтаараа цул байж чадахгүй ашиг сонирхолд дөрлүүлж байгааг, ард түмний амьдрал доройтож, аж ахуй нэгжүүдийг 10.5 их наядын татвараар нэмж дарамтлахаар зэхэж байгааг, эрчим хүч, дулааны үнийг нэмж, улаан цайм ард түмнээ мөлжих гэж байгааг харж байгаа. 

Нам намдаа “төмсөгдүүлсэн” УИХ-ын гишүүд нь үг хэлж чадахгүй парламентын хяналт алдагдаж байгааг тэр нүд цавчихгүй харж байгаа. Харсан бүхнээ харин нэгтгэж байгаад ханз татан банга хүртээхээ тэр мэдэж байгаа хэмээн ард түмэн итгэж байна. 

Мордохын хазгай, буруу зүйлд хэрхэн хатуу хандахыг ард түмэн харин харж байгаа. Хэлсээр байтал, сануулсаар байтал дүлий мэт аашилсан хүмүүст ямар хариуцлага тооцохыг ч ард түмэн харж байгаа. 

Өдрөөс өдөрт амьдралын чанар муудаж байгааг, авсан цалин нь зээлээс зээлийн хооронд байгааг, баялаг бүтээгчид нь татвар, НД-т дарлуулан сөхөрч байгааг Төрийн тэргүүн харж байгаа. Төрийн тэргүүний бүрэн эрхийн хугацаа талдаа орж байна. Намын харьяалал гэхээс илүү ард түмний харьяалал дор тэр бүгдийг харж байгаа тул хариуцлага тооцоход ч бэлэн байгаа гэж итгэх хүн олон байна. Дураараа дургиж, дунд чөмгөөрөө жиргэсэн Засгийн газартаа алганы амт үзүүлэхгүй бол ард түмэн чинь туйлдаж байна, Ерөнхийлөгч өө.

Р.ЖАРГАЛ