Батлан хамгаалах салбараас төрийн дээд цол хүртсэн алдартнуудад хүндэтгэл үзүүллээ

Ерөнхийлөгч У.Хүрэлсүх Тулгар төрийн 2233, Их Монгол Улс байгуулагдсаны 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойг тохиолдуулан зарлиг гаргаж, нэр бүхий эрхмүүдэд төрийн дээд цол, одон, медаль хүртээсэн.

Тэдгээр эрхмүүдийн дундаас Зэвсэгт хүчний “Алдар” спорт хорооны дарга, дархан аварга, МУГТ Г.Өсөхбаяр Хөдөлмөрийн баатар, соёл, урлагийн салбарын хөгжилд жинтэй хувь нэмэр оруулсан хөгжмийн зохиолч, удирдаач, УГЗ Ш.Гун-Аажав Ардын жүжигчин, ЗХЖШ-ын хэвлэл мэдээллийн албаны дарга хурандаа Б.Отгонбаяр Соёлын гавьяат зүтгэлтэн цолоор шагнагдсан билээ.

Тэгвэл өнөөдөр батлан хамгаалах салбараас төрөн гарсан эдгээр алдартнуудад салбарын удирдлагууд хүндэтгэл үзүүлэв. Энэ үеэр Монгол Улсын Засгийн газрын гишүүн, Батлан хамгаалахын сайд Г.Сайханбаяр төрийн дээд цол хүртсэн алдартнуудад баяр хүргэж, эрхэлсэн албандаа үнэнч, үлгэр жишээчээр ажиллаж, салбарынхаа нэр хүндийг өндөрт өргөж байгаад Батлан хамгаалах, Зэвсэгт хүчний нийт бие бүрхэлдэхүүний нэрийн өмнөөс талархал илэрхийлсэн юм.