Д.Оюунгэрэл: Томуу, томуу төст өвчин идэвхжилийн түвшинд шилжээд байна

Томуу, томуу төст өвчний нөхцөл байдлын талаар ХӨСҮТ-ийн Тандалтын албанаас мэдээлэл өглөө.

ХӨСҮТ-ийн ТҮН-ийн халдвар судлагч их эмч Д.ОЮУНГЭРЭЛ:

-Дэлхий дахинд улирлын томуугийн H1N1, H3N2 болон томуугийн B вирус орчилд байна. Ялангуяа Зүүн өмнөд Азийн улс орнуудад хамаарч байна. Харин ОХУ-д H1N1 вирус давамгайлан орчилд байгаа юм.

Амьсгалын замын синцитиал вирус иргэдийн дунд нэлээд идэвхжилтэй байна. Ялангуяа АНУ болон Европын холбооны улсад идэвхжилтэй байна. Манай улсын хувьд аравдугаар сарын сүүлээс томуу, томуу төст өвчний идэвхжил аажмаар нэмэгдсэн. Арваннэгдүгээр сарын 5-ны өдрийн байдлаар өвчлөл идэвхжилийн түвшинд шилжээд байна. Манай улсын нийт аймгуудын 80 орчим хувь нь идэвхжилийн түвшинд байна. Дорнод, Дорно-Говь аймагт алаг цоог дэгдэлтийн вирусийн идэвхжилтэй байна.

Энэ хугацаанд амбулаториор нийт 300 мянга гаруй хүн эмнэлэгт хандан үйлчлүүллээ. Үүний 5.2 хувь томуу, томуу төст өвчний шалтгаантай байна. Энэ нь өмнөх долоо хоног болон өнгөрсөн оны мөн үетэй харьцуулахад, бага зэрэг нэмэгдсэн үзүүлэлттэй байгаа юм. Тус хугацаанд 9000 хүн эмнэлэгт хэвтэн эмчлүүлж байгаагаас 21 хувь орчим нь амьсгалын замын цочмог буюу уушгины хатгаатай байна. Үүнийг өмнөх долоо хоног болон өнгөрсөн оны мөн үетэй харьцуулахад 1.6 хувиар нэмэгджээ. 

Насны ангиллаар, томуу, томуу төст өвчнөөр өвчлөгсдийн,

80 хувь орчим нь 15 хүртэлх насны хүүхдүүд
50-60 хувь нь 0-4 насны хүүхэд байна.
Дөрөв хүртэлх насны хүүхдүүдийн дундах өвчлөлийг задалбал, 40-50 хувь 0-2 хүртэлх насны хүүхдүүдийн дунд их байна. Өөрөөр хэлбэл, хоёр нас хүртэлх хүүхдүүдийн дунд өвчлөл хүнд тохиолдож байна гэж харлаа.

Дархлаажуулалтын хувьд улирлын томуугийн эсрэг 300 мянга гаруй хүн тун вакцинаар бага насны хүүхдүүд, жирэмсэн эмэгтэй,  65-аас дээш насны архаг өвчтэй буюу эрсдэлт бүлгийн хүн амыг хамруулсан. Улсын хэмжээн 80 хувь орчмын дархлаажуулалтыг хийсэн.

Ялангуяа бага насны хүүхдүүдийн дунд өвчлөл нэмэгдэж байгаатай холбогдуулан зөвлөхөд, хүүхдэд эмнэл зүйн шинж тэмдэг илрэхэд буюу халуурах, хоолой өвдөх, толгой өвдөх, бөөлжих, суулгавал харьяа өрхийн эмнэлэгт хандаарай. Мэргэжлийн эмчийн заавар зөвлөгөөний дагуу эмчилгээ хийлгэх шаардлагатай.

Мөн үүнээс гадна энгийн сэргийлэлтийн аргуудыг эцэг, эх, ААНБ-ууд хэрэгжүүлэх шаардлагатай байна. Үүнд, өдөрт 2-3 удаа өрөөний агаар сэлгэх, долоо хоногт 2-3 удаа чийгтэй цэвэрлэгээ хийх, шаардлагагүй бол олон нийтийн газраар бага насны хүүхдүүдийг дагуулж явахгүй байгаарай.

Хэрэв танд эмнэл зүйн шинж тэмдэг илэрвэл, амны хаалтыг зөв зохистой зүүх, гараа угаах, зөв ханиалгаж, найтаах зэрэг энгийн аргуудыг авч хэрэгжүүлэх шаардлагатай байна.

Мөн томуу төст өвчний 90-95 хувь нь вирусийн гаралтай байдаг тул дур мэдэж бүү эмчил" гэж зөвлөлөө.