Үндсэн хуульд оруулах нэмэлт, өөрчлөлтөөс болж МАН дахин хагарна

Хам хум, халтар хултар улсын төсвөө батлаад парламент амар сайхандаа жаргаж байна. Дараагийн дуулиан Үндсэн хуульд оруулах нэмэлт, өөрчлөлтийн асуудал байх юм. Дуртай үедээ эцэг хуульдаа “гар хүрдэг” болсон парламент энэ удаа дахин “гар хүрэх”-ээс өөр сонголтгүй болоод байна. Учир нь 2027 онд Ерөнхийлөгчийн сонгууль болно. Энэ удаагийн сонгуульд одоогийн Ерөнхийлөгч У.Хүрэлсүх дахин нэр дэвших цонхыг нээж өгөх үү, эсхүл өөр хүн дэвших үү гэдэг асуултын хариултыг тэд хамтдаа эрцгээх юм. МАН-ынхан эрх барьж байхдаа Х.Баттулгыг Ерөнхийлөгчид дахин нэр дэвшүүлэхгүйн тулд Монгол Улсын Ерөнхийлөгч нь зургаан жилээр нэг удаа сонгогдоно гэдэг хуулийн заалтыг Үндсэн хуульд оруулсан. Тэгвэл энэ нь эргээд У.Хүрэлсүхэд гай болж байгаа. Тиймээс л түүний бүрэн эрхийг дахин үргэлжлүүлэх, шинэ Ерөнхийлөгчтэй болох дээр МАН-ынхан төсөв батласнаасаа илүү хагарах дүр зурагтай байна. 

Парламентад У.Хүрэлсүх өөрийн хүмүүстэй, МАН-ын дарга, Ерөнхий сайд Л.Оюун-Эрдэнэ ч мөн өөрийн “сүргийг” бүрдүүлж эхэлсэн. Нөгөө талд нь УИХ-ын дарга Д.Амарбаясгалан, ЕТГ-ын дарга Г.Занданшатар, Хотын дарга Х.Нямбаатараас эхлээд цөөн хүмүүсээ багцална. 

Нөгөө талд нь 42 гишүүнтэй Л.Гантөмөр МАН-ын аль талд барьцаа авах вэ гэдэг анхаарал татна. Хар залуугаараа улс төрийн карьераа дуусгахыг У.Хүрэлсүх хүсэхгүй. Харин У.Хүрэлсүхэд тийм боломжийг нь олгохгүй “тэтгэвэр”-т нь суулгах хүсэлтэй хүмүүс нам дотор нь дүү нарынх нь дунд ч бий. 

Хэрэв У.Хүрэлсүхийг нэр дэвшүүлэх замыг нээж өгвөл түүний гол өрсөлдөгч нь УИХ-ын гишүүн, Монгол Улсын 5 дахь Ерөнхийлөгч Х.Баттулга байх нь дамжиггүй. Тиймээс Х.Баттулгыг чагталж, У.Хүрэлсүхэд боломж олгох гарцын эрэлд МАН-ынхан гарсан. Гэхдээ Х.Баттулга, У.Хүрэлсүхийн алийг нь ч дэвшүүлэхгүй байх дээр МАН-ын залуу лидерүүдэд байсаар байгааг мартаж болохгүй. 

Тиймээс олон талын ашиг сонирхол нэгдэж байж ҮХНӨ явна гэсэн үг. Төсвийн хэлэлцүүлгийн шатанд МАН дотроо хагарч хоёр туйл руу явж болдогийг харуулсан. Үүнээс ч ширүүн маргаан ҮХНӨ-ийн үед өрнөж таарах нь гарцаагүй. Гишүүдийн дэмжлэгийг авахын тулд холбогдсон хэргээр нь “төмсөгдөх”-өөс эхлээд юм юм л болно. 

Р.ЖАРГАЛ