Хуулийн төсөл: Гадаад иргэнийг ажиллуулахдаа дагалдан сургаагүй, чиг баримжаа олгоогүй бол ₮500 мянгаар торгоно

УИХ-ын гишүүн П.Сайнзориг, Н.Батсүмбэрэл нар Монгол Улсад хөдөлмөр эрхлэх гадаад ажилтны тоо, хувь хэмжээ тогтоохгүй байх, ажлын байрны төлбөрөөс чөлөөлөх тухай хуулийн төслийн УИХ-ын дарга Д.Амарбаясгаланд өргөн барьсан билээ.

Уг хуулийн төслийн хүрээнд Зөрчлийн тухай хуульд дараах өөрчлөлтийг оруулахаар тусгажээ. 

Тодруулбал,  "Хуульд заасан бүртгэлтэй ажилгүй иргэнийг ажлын байранд дагалдуулан сургах үүргээ биелүүлээгүй, эсхүл, гадаад ажилтныг хөдөлмөрийн чиг баримжаа олгох сургалтад хамруулаагүй, эсхүл, эрүүл мэндийн үзлэг, шинжилгээнд хамруулах үүргээ биелүүлээгүй бол хуулийн этгээдийг таван зуун нэгжтэй тэнцэх хэмжээний төгрөгөөр торгоно" хэмээсэн байна. 

Мөн "Ажил олгогч гадаад улсаас ажилтан авах зорилгоор тухайн ажлыг хийж гүйцэтгэхэд шаардлагатай мэргэжил, ур чадварыг хэт өндөр тавих, ажлын байрны шаардлага хангасан Монгол Улсын иргэнийг хөдөлмөр эрхлүүлэхээс үндэслэлгүйгээр татгалзсан нь тогтоогдсон бол хуулийн этгээдийг таван зуун нэгжтэй тэнцэх хэмжээний төгрөгөөр торгоно" гэж тусгажээ.