БНСУ-ын Ерөнхийлөгчийг баривчлахаар мөрдөн байцаагчид гэрт нь ирээд байна

Өмнөд Солонгосын Ерөнхийлөгч Юн Сук Ёлыг баривчлахаар мөрдөн байцаагчид албан өргөөнд нь нэвтрэхээр ирсэн талаар Yonhap агентлаг мэдээллээ. 

Тодруулбал, Өнгөрөгч арванхоёрдугаар сарын 3-нд Ерөнхийлөгч Юн Сук Ёл улс даяар цэргийн дэглэм тогтоох тухай зарласан. Үүнтэй холбогдуулан шүүүхээс түүнийг бослого зохион байгуулсан хэргээр яллах тогтоолыг энэ долоо хоногийн эхээр гаргасан юм. Улмаар мөрдөн байцаагчид түүнд зарлан дуудах мэдэгдэл гурван удаа хүргүүлсэн ч тэр хүлээж аваагүй учир ийн өргөөнд нь нэвтрэхээр иржээ. 

Энэ талаар Өндөр албан тушаалтнуудын Авлигын хэргийг мөрдөх албанаас "Бид Ерөнхийлөгч Юн Сук Ёлыг баривчлах захирамжийг хэрэгжүүлж байна" хэмээн мэдэгдсэн байна. 

Гэвч Ерөнхийлөгчийг дэмжигчид өргөөнийх нь гадна жагссаар байгаа бөгөөд жагсагчдын тоо амралтын өдрүүдээр улам нэмэгджээ. Мөн Ерөнхийлөгчийн өмгөөлөгчид түүнийг баривчлах захирамжийг хууль бус хэмээн үзэж буйгаа мэдэгдсэн ба тийм ч учраас хамгаалалтын албаныхан нь мөрдөн байцаагчдын өмнөөс эсэргүүцэл илэрхийлж эхэлсэн байна.

Ерөнхийлөгч Юн Сук Ёлыг баривчлах шүүхийн захирамжийн хугацаа ирэх Даваа гарагт дуусна. Хэдийгээр баривчлах захирамжийн хугацаа дуусах хүртэл зай байгаа ч түүнийг дэмжин жагсаж буй иргэдийн тоо ирэх амралтын өдрүүдээр улам нэмэгдэж, ажиллагаанд саад учруулах эрсдэлтэй хэмээн үзжээ. Харин Даваа гарагт баривчлах нь хэт цаг нь тулчихна гэж үзсэн бололтой.

Хэрэв Юн Сук Ёлыг баривчилбал эхлээд Гванчон дахь Авлигтай тэмцэх агентлагийн төв байранд хүргэх юм байна. Баривчлах хугацаа нь 48 цаг бөгөөд энэ хугацаанд багтаан Юн Сук Ёлоос байцаалт авна. Байцаалтын явцаас шалтгаалан саатуулах хугацааг сунгах эсэхийг шийдэх аж. 

Эх сурвалж: Yonhap