Голуудын мөсний зузаан ОЖД-аас 5-15 см нимгэн байна

2024 оны арваннэгдүгээр сарын нэгдүгээр арав хоног

Хойд мөсөн далайн ай савын гол, мөрөн

Хөвсгөлийн уулсаас эхтэй Дэлгэрмөрөн, Эг, Бэлтэс, Бүгсий, Үүр, Шишхэд зэрэг голуудад мөсөн зах, дунд зэргийн зайр зонхилон ажиглагдаж, 5-20 см зузаан мөсөн бүрхүүлтэй болсон байна. Эдгээр голуудын мөсний зузаан өмнөх оны мөн үе болон олон жилийн дунджаас 5-15 см нимгэн байна. 

Хангай нурууны арын Идэр голын эхээр 15-20 см зузаан мөстэй болсон бол Хануй, Чулуут, Суман, Хойттамир, Урдтамир зэрэг голуудад мөсөн зах, өтгөн зайр гүйх үзэгдэл давамгайлан ажиглагдаж байна. 

Хэнтий нурууны баруун хажуугаас эхтэй Хүдэр, Хараа, Ерөө, Туул, Тэрэлж, Сөгнөгөр, Сэлбэ, Улиастай, Шарын гол зэрэг голуудад мөсөн зах, шингэн, өтгөн, дунд зэргийн зайр гүйх үзэгдэл голлон ажиглагдаж эхэлсэн бол Хүдэр, Сэлбэ голын эх Санзай орчимд 5-15 см зузаан мөсөн бүрхүүл тогтсон байна. 

Сэлэнгэ мөрөн Орхон голын дагууд тогтвортой мөсөн бүрхүүл тогтож амжаагүй бөгөөд мөсөн зах, зайр, бижрүү, мөсөн хөвлөг хөвөх зэрэг үзэгдэл ажиглагдаж байна. 

Номхон далайн ай савын гол, мөрөн

Хэнтий нурууны ар, зүүн хажуугаас усжих Хурх, Барх, Эг, Балж, Онон, Хэрлэн, Улз болон Их Хянганы нуруунаас эхтэй Халх зэрэг голуудад мөсөн зах үүсэх, шингэн, өтгөн, дунд зэргийн зайр гүйх үзэгдэл зонхилон ажиглагджээ.

Төв Азийн гадагш урсацгүй ай сав

Алтай нуруунаас эхтэй Сагсай, Харбут, Чигэртэй, Согоог зэрэг голуудад 10-15 см зузаан мөсөн бүрхүүл тогтсон бол бусад голуудад мөсөн зах, шингэн, өтгөн, дунд зэргийн зайр гүйх, харуулаас доош зайрын хахаа үүсэх зэрэг үзэгдэл голлон ажиглагдаж эхэлжээ.

Хангай нурууны өврийн Буянт, Хожуул, Заг, Байдраг, Шаргалжуут, Цагаантуруут, Шар ус зэрэг голууд 10-25 см зузаан мөстэй болсон бол Чигэстэй, Богд, Хүнгүй, Завхан, Зүйл, Шарга, Түй, Онги, Зэгстэй, Таац зэрэг голуудад мөсөн зах өргөжин зузаарах, шингэн, өтгөн, дунд зэргийн зайр гүйх зэрэг намрын мөсний үзэгдэл идэвхжиж эхэлсэн байна.

Увс нуурын савын Чигж, Хархираа, Баруунтуруун, Түргэн, Тэс, Хариг, Хангилцаг, Хархираа, Намир зэрэг голуудад мөсөн зах үүсэх үзэгдэл ажиглагдаж байна. 

Арваннэгдүгээр сарын эхний арав хоногийн байдлаар манай орны томоохон болон дунд зэргийн голуудад мөсний үзэгдэл идэвхжиж эхэлсэн бол жижиг голууд битүү мөсөн бүрхүүлтэй болсон байна.

Эх сурвалж: УЦУОСМХ-ийн Гадаргын усны судалгааны хэлтэс