Ө.Шижир: Д.Энхтүвшин гишүүний шийдвэр гаргалцдаг байшинд хүссэн шийдвэр нь гарахгүй байгаа юм уу даа

УИХ-ын гишүүн Д.Энхтүвшин хэвлэлд өгсөн ярилцлагадаа "Засгийн газрыг Төрийн ордонд бус “Гэрэгэ тауэр”-ийн 15 давхарт удирддаг болоод удаж байна. Тэнд “Буян”-ийн Жагаагаас эхлээд, бүх улс төрийн намын удирдлагууд, сайд нар очиж даалгавар, чиглэл авдаг. Кино, найруулга хийдэг болсон" хэмээн ярьсан. 

Үүнтэй холбогдуулан УИХ-ын гишүүн Ө.Шижир байр сууриа илэрхийлэв.

Тэрбээр "Ганц компани Монголын ард түмний баялаг болох Эрдэнэс тавантолгойг, экспортын төмөр замыг хуу хамах төлөвлөгөө нь бүтэлгүйтчихээр төлөөний хүмүүс нь бухимдаад хэцүү байх шиг байна. Нэг компани улсын өнгөтэй өөдтэй тендер бүрийг хамж, баялаг бүрийг эзэмшинэ гэдэг шудрага ёс уу? Эрдэнэс тавантолгой нь улсад үлдээд, экспортын төмөр замуудаа төр нь өөрөө хийх болсон нь таалагдахгүй байгаа юм уу?

Централ товер, Шангри-Лагаас улс орны бүх асуудлыг шийдэж, Ерөнхий сайдаас авхуулаад Цагдаагийн ерөнхий газрын даргаас эхлээд бүх томилгоо тэндээс хийгдэж, хэн хэн аль аль намаас нэр дэвших асуудлыг шийдэж, улс төрчдийг сонгуулийн хандив, дэмжлэг нэрээр нөлөөлдөг байсан нь нууц биш шүү дээ. Д.Энхтүвшин гишүүний маань шийдвэр гаргалцдаг байшинд хүссэн шийдвэр нь гарахгүй байгаа юм уу даа. Тэгээд л бачуураад байгаа байх…. Та нар санаж байгаа бол сонгуулиар хамгийн олон улс төрчдөд хандив өгсөн компани юу билээ? Ил нь тэр болохоос далд нь юу ч байгаа юм билээ" хэмээжээ.