Говийн бүсийн 100 гаруй тэмээчин "Монгол тэмээ тогтвортой хөгжлийн боломж" сэдвээр чууллаа

 

Дэлхийд ховордож байгаа хос бөхт тэмээний удмын санг хамгаалж, өсгөн үржүүлж буй цөөн орны нэг нь Монгол Улс. Тиймээс тэмээн сүргийн тоо толгойг өсгөх, үүлдэр ашиг шимийг бататган сайжруулах соёл, аялал жуулчлалыг тэмээн спорттой уялдуулан "Их говийн тэмээ-2025" арга хэмжээний хүрээнд ХХААХҮЯ, Өмнөговь аймгийн Засаг даргын тамгын газар, Хүнс, хөдөө аж ахуйн газартай хамтран "Монгол тэмээ тогтвортой хөгжлийн боломж" хэлэлцүүлгийг зохион байгууллаа.

Хэлэлцүүлэгт Олон улсын тэмээн уралдааны холбооны жендерийн хорооны дарга Б.Чандмань, Австрали улсын "Boulie Camel Racing" арга хэмжээг санаачлагч, Олон улсын тэмээн уралдааны холбооны төлөөлөгч Падди Макхю, 1.1 сая дагагчтай адал явдалт аяллын контент бүтээгч, сошиал медиа инфлүүнсэр Сальма, Саудын Араб улсын Ал-Хофуф тэмээ-Мал эмнэлгийн доктор, адууны эмнэл зүйн компани Eguine Clinic Egui-Tech үүсгэн байгуулагч эмч, малын мэс засалч Маргарийт зэрэг илтгэгч нар оролцлоо.

Тэмээнээс олох эдийн засгийн үр өгөөж, боломж сэдвээр тэд илтгэлүүд танилцуулж, хэлэлцүүлэг өрнүүллээ. Энэхүү хэлэлцүүлэгт говийн бүсийн 100 гаруй тэмээчид оролцож, санал солилцсон юм.