М.Тулгатын зөвлөх Ч.Отгонжаргалын ахын компани тендергүйгээр шахмал түлшний агуулахыг 748 саяар барьжээ

Нийслэлийн төсвийн хөрөнгөөр сайжруулсан түлшний агуулах барих ажлыг сонгон шалгаруулалтгүйгээр 748.2 сая төгрөгөөр шууд гүйцэтгэсэн Евро Азиа Констракшн ХХК-ийн тухай мэдээллийг хүргэж байна. 

Анх 2011 онд Гадаад худалдаа, газар тариалан, аялал жуулчлалын үйлчилгээ эрхлэх чиглэлээр үүсгэн байгуулагдсан боловч анхны тендерээ 2018 онд авч байсан нь “Зорчигч тээвэр гурав ОНӨААТҮГ-ын сэлбэгийн агуулах” барих ажлыг 300,600,484 төгрөгөөр гүйцэтгэж байж. Үүний дараа 2019 онд мөн Зорчигч тээвэр гурав”-ын агуулахыг 300 сая төгрөгөөр, 2023 онд "Түрээсийн орон сууц хөтөлбөр"-ин хүрээнд Өмнөговь аймагт орон сууцны барилга угсралтын ажлыг 6 тэрбум төгрөгөөр гүйцэтгэж байжээ. 

Евро Азиа Констракшн ХХК нь 2011 оноос хойш барилга угсралтын чиглэлээр үйл ажиллагаа явуулж буй. Тэгвэл өнөөдрийг хүртэл ганцаар тогтохгүй олон салбар болжээ. Евро ази пропортиз, Евро ази майнз, Евро ази трэйд, Улаанбаатар ариутгал ХХК гэх мэт. 

Евро Азиа Констракшн ХХК-ийн эцсийн өмчлөгч нь Чимэдцэрэнгийн Энхбат. Харин Ч.Энхбатын дүү Ч.Отгонжаргал нь Улаанбаатар Ариутгал ХХК-ийн эзэн, Doctor water брэндийн үүсгэн байгуулагч. Тус компани нь нийслэлийн дүүргүүдийн зам, талбайн ариутгал, хөрсний бохирдол ариутгах гэх мэт 153 тендерт оролцож 54 тендерт тэнцэж ажилласан байгаа юм. 

Жишээлбэл, “Хог хаягдал хийх уут, хайрцаг-83 сая, 2019 он”, “"Нийтийн эзэмшлийн зам талбай, авто замын халтиргаа, гулгааг арилгах давс, бодис нөөцлөх ажил-80 сая 2019 он", “СЭМҮТ-ийн Хог хаягдал зайлуулах, хортон мэрэгчийн устгал, ариутгалын бараа, үйлчилгээ худалдан авах-104 сая 2019 он”, “УБХЗАА-Халтиргаа гулгаа арилгах байгалийн давс худалдан авах-179 сая, 2020 он”, “УБХЗАА-Халтиргаа гулгаа арилгах байгалийн давс худалдан авах-195 сая, 2021 он” гэх мэт Нийслэлийн Засаг дарга асан С.Батболдын үеэс Д.Сумъяабазар нарын ажиллаж байх хугацаанд хамаарч байна. 

 

Ч.Отгонжаргал нь ахынхаа Евро Азиа Констракшн ХХК-йин менежерээс ажлын гараагаа эхэлжээ. Тэрбээр, 2016 онд Нийслэлийн хөрөнгө оруулалтын газрын эдийн засагчаар ажиллаж байгаад 2022 оноос НИТХ-ын төлөөлөгч М.Тулгатын зөвлөхөөр ажиллаж буй. Өнгөрсөн оны УИХ-ын сонгуульд БЗД-ээс нэр дэвшээд амжсан. Түүний Улаанбаатар ариутгал ХХК нь нийслэлийн хөрсний бохирдол, ариутгал халдваргүйтгэлийн бараг бүх л ажлыг авдаг гэхэд хилсдэхгүй.