О.Алтангэрэл: Тавантолгой түлш ХХК-тай холбоотой дарга нарт эрүүгийн хэрэг үүсгэж, шалгаж байна

ХЗДХ-ийн сайд О.Алтангэрэл нэг гэр бүлийн зургаан хүн угаартаж нас барсан асуудлаар өнөөдөр /2025.02.07/ мэдээлэл өглөө.

Тэрбээр 2025 оны нэгдүгээр сарын 23-нд зургаан хүний амь нас хохирсонд эмгэнэл илэрхийлээд "Энэхүү хэрэг явдлын хохирогч болсон О.Одбаяр нь албаа үлгэр жишээ хааж, хамт олондоо бахархал болсон байлдагч юм. Хэрэгтэй холбогдуулан цагдаагийн байгууллага АТГ-тай хамтран мөрдөн шалгах үйл ажиллагаа явуулж байна. Цагдаагийн байгууллагын хувьд Тавантолгой түлш ХХК-тай холбоотой үе үеийн удирдлагуудад эрүүгийн хэрэг үүсгэж, тус газрын үйл ажиллагаатай холбоотой 2018-2024 онд удирдлага болон төлөөлөн удирдах зөвлөлийн гишүүнээр ажиллаж байсан этгээдүүдэд гэрээ, гэрээний биелэлттэй холбоотой асуудалд мөрдөн шалгалт явуулж байгаа. 29 нэр төрлийн бодист мэргэжлийн байгууллагаас шалгаж байна. Түлшний  цардуул, барьцалдуулагчтай холбоотой асуудал гарвал арга хэмжээ авна.

Эдгээр албан тушаалтнууд, барьцалдуулагчтай холбоотойгоор хуулийн дагуу хариуцлага тооцно. Зөвхөн дээрх хохирогчид биш угаартаж амиа алдсан иргэдийн талаар ч авч хэлэлцэх болно.

Өчигдөр иргэдийн хувийн эмзэг мэдээллийг агуулсан, хүн харахад цагдаагийн илтгэх хуудас хэлбэрээр бичигдсэн мэдээлэл 21:00 цаг орчимд цацагдсан. Энэ нь хүний хувийн мэдээлэл хамгаалах хуулийг ноцтой зөрсөн, Эрүүгийн хуулийн 11 дүгээр зүйлээр хариуцлага хүлээлгэх гэмт хэрэг юм. Хэрэв хувь хүний нууцыг задруулсан бол 5 хүртэлх жилээр хорих ялтай, хүндрүүлэх нөхцөлтэй байдаг. Энэ мэдээллийг албан шугамаар олж аваад цацсан бол гэмт хэрэг.

Энэ бол зөвхөн нэг алба хаагчийн алдаа биш, цаашлаад ЦЕГ-ын удирдлагуудын түвшинд хариуцлага тооцно.

Өчигдөр шөнө яаралтай ажлын хэсэг байгуулагдсан. Энэ мэдээлэлд дурдсан зарим нь үнэнтэй нийцэхгүй ташаа мэдээлэл байсан. Нэг үгээр нэг хэсэг нь цагдаад байхгүй мэдээлэл байсан ч, мөн цагдаад хадгалагдаж байсан мэдээлэл байна. Тэгэхээр зориудаар ташаа мэдээлэл түгээсэн байна. Хэн үүнийг хийв, цагдаагийн байгууллага илрүүлэхээр ажиллаж байна.

Мэдээлэл хийсэн байлдагчтай холбоотой олон нийтийн санаа зовнил байна. Хуулийн байгууллагаас түүнийг хамгаална, түүний эрхэд халдсан үйл ажиллагаа явуулахгүй гэсэн байр суурьтай байна.

Мөрдөн шалгах ажиллагааны явцад аливаа мэдээллийг задруулахгүй байх зорилгоор хохирогчдоор гарын үсэг зуруулдаг. Энэ нь хуулийн зохицуулалт. Харин мөрдөн шалгах ажиллагаанд холбоогүй мэдээллийг хохирогч ярих боломжгүй болгосон байвал энэ бол хууль зөрчсөн үйлдэл болно.