Монгол Улс авлигын индексээр 7 байр урагшилж, 114-д бичигдлээ

Монгол Улс авлигын индексээр долоон байр урагшилж, 114-д бичигдлээ.

Тодруулбал, Германы Берлин хотод төвтэй "Транспэрэнси интернэшнл" олон улсын байгууллагаас жил бүр улс орнуудын төрийн албан дахь авилгын талаар шинжээч бизнес эрхлэгчдийн судалгаанд үндэслэн авилгын төсөөллийн индексийг боловсруулдаг юм. Уг судалгааны 2024 оны дүнг өнөөдөр /2025.02.11/ дэлхий нийтэд зарлалаа.

Авлигын индексээр 180 орноос манай улс 33 оноогоор 114 дүгээр байранд жагсжээ. Эл байранд манай улсаас гадна Беларус, Лаос, Филиппин, Ангола зэрэг зургаан улс жагссан байна.

Ази-Номхон далайн онцлох бүс нутгуудын төрийн салбарын авилгын төсөөллийг 0-100 хүртэлх оноогоор дүгнэдэг бөгөөд 0 бол өндөр үзүүлэлт, 100 бол маш цэвэр хэмээн тооцдог. Тэгвэл Монгол Улс өнгөрөгч онд 33 оноогоор дүгнэгдэж байсан бол энэ онд мөн ялгаагүй 33 оноо авчээ.

Ази номхон далайн бүсийн авлигын индексийн дундаж оноо 44 байдаг. Ардчилал бүрэн хэрэгждэг улс орнуудын дундаж оноо 73, ардчилал нь гажуудсан орнуудын оноо 47 байдаг бол ардчилсан бус засаглалтай орнууд дунджаар 33 оноо авдаг байна. 

Сануулахад, Монгол Улс Авлигын индексээр сүүлийн таван жилд:

• 2019 онд 35 оноо авч, 180 улсаас 106 дугаарт,

• 2020 онд 35 оноо авч, 180 улсаас 111 дүгээрт,

• 2021 онд 35 оноо авч, 180 улсаас 110 дугаарт,

• 2022 онд 33 оноо авч, 180 улсаас 116 дугаарт,

• 2023 онд 33 оноо авч, 180 улсаас 121 дүгээрт тус тус эрэмблэгдэж байв.