Сурвалжилга: Иргэд ломбардад лизингийн гар утас, мөнгөн эдлэлээ тавих нь ихэсжээ

Сар шинийн баярыг монголчууд өргөн дэлгэр тэмдэглэдэг ард түмэн билээ. Судалгаанаас үзэхэд сар шинийн баяраар 1.3 их наяд төгрөгийг худалдан авалтад зарцуулдаг бөгөөд 70 гаруй хувийг нь импортын бэлэг худалдан авахад зарцуулдаг байна.

Тэгвэл сар шинийн баяраас өмнө иргэд ломбардад эд зүйлсээ барьцаалах нь элбэг байдаг аж. Тухайлбал, мөнгөн эдлэл, лизингийн гар утсаа барьцаанд тавьж зээл аван сар шинийн баярын бэлтгэл ажлаа базаадаг байна. Тэгвэл үүнтэй холбогдуулан дараах сурвалжилгыг бэлтгэлээ. 

"Эд зүйлээ барьцаалаад 3-4 сар болж байгаа хүмүүс ч байгаа"

Эд зүйлээ барьцаалаад 3-4 сар болж байгаа хүмүүс ч байгаа талаар ломбардын эзэд хэлж байв.

Түрээс өндөр болохоор ломбардын эздэд төдийлөн ашиг гардаггүй аж. Өнгөрсөн жилээс хойш ломбардууд хаалгаа бариад түүнээс хойш орлого ч муудсан талаараа хэлж байсан юм.

Өнгөрсөн 2024 оны гуравдугаар сарын 1-нээс ломбардын зээлийн хүү 4.5 хувь болсон билээ. 

Иргэд ихэвчлэн гар утсаа барьцаанд тавьдаг ажээ. Зарим нь эд зүйлээ барьцаалчхаад сарын дараа авдаг байна. Өдөрт сайндаа 10, муу бол гурав, дөрвөн хүн орж ирдэг хэмээв.

Хүмүүс ихэвчлэн IPhone загварын утас тавьдаг аж. Мөн лизингээр орж ирсэн утаснууд их байдаг байна. 20 мянган төгрөгөөс нэг сая хүртэлх төгрөгийн үнэ бүхий зүйл барьцаанд тавих нь элбэг ажээ. Зарим нь 60-70 мянгад барьцаалчхаад хүүхдийн мөнгө орохоор авдаг аж. Хэрэв бүр аргагүй болбол хугацаагаа сунгуулдаг байна. Энэ жилийн тухайд ломбардад эд зүйлсээ тавих иргэд өнгөрсөн жилүүдийнхтэй харьцуулахад ихсээгүй гэдгийг ломбардын эзэд хэлж байв.

Мөн сар шинийн баяр дөхөөд ирэхээр мөнгөн эдлэл, лизингийн гар утас барьцаанд тавих хүмүүсийн тоо ихэсдэг байна.

"Цагаан сараар эд зүйлсээ барьцаалсан хүмүүс ихэнх нь сар шинэ өнгөрөхөөр 7-14 хоног дотроо багтаагаад барьцаалсан зүйлсээ аль болох хугацаандаа авдаг" хэмээн зарим ломбардын эзэд хэлж байв. Цалин буух үеэр буюу сарын эхэн, сүүл хэсгээр буцаалт их байдаг байна.

Мөн сарын эхээр НӨАТ-ын буцаан олголт, тэтгэвэр, тэтгэмжийн мөнгө орох үеэр буцаалт их байдаг ажээ.

"Хүний өмнөөс ломбардад юмаа тавьчхаад одоо хүртэл авч чадаагүй"

Харин иргэдийн зүгээс:

-Дээр үед ажил хийж байхдаа ломбардаар их үйлчлүүлдэг байсан. Одоо тэтгэвэртээ гараад хүүхдүүд бүгдийг нь бэлдээд өгчихдөг болохоор үйлчлүүлэхгүй байгаа. Хүний өмнөөс ломбардад юмаа тавьчхаад одоо хүртэл авч чадахгүй байж л байна. Нөгөө хүүхдэдээ хэлэхээр “Ажилгүй болчхоод байна” л гэдэг. Цагаан сар дөхүүлээд хүмүүс ломбардад эд зүйлсээ тавих тохиолдол сонсогдоод л байдаг.

Иргэн А.Мөнх-Од:

-Манай уурхайд ажилладаг найзад асуудал гараад “Зээл сунгаад өгөөч” гэхээр нь л сунгаж өгч байна. Түүнээс би эд зүйлсээ тавьж үзээгүй болохоор сайн мэдэхгүй байна.

Иргэн н.Отгон-Эрдэнэ:

-Сар шинийн баяр санхүүд мэдээж тодорхой хэмжээнд нөлөөлнө. Одоо үнэхээр мөнгөний ханш чанга болчихлоо. Хүн бүхэн л сар шинээ аятайхан тэмдэглэчих юм сан гэсэн бодолтой явж байгаа шүү дээ. Тэгэхээр мөнгөний хэрэгцээ байгаа учраас л хүмүүс эд зүйлээ ломбардад тавьж байгаа байх. Би ломбардаар үйлчлүүлж үзсэн. Хүмүүс мөнгөний хэрэгцээтэй үедээ аль үнэд хүрэх зүйлсээ л тавина шүү дээ. Ихэвчлэн 14-31 хоногийн хооронд л тавина.

Миний хувьд цагаан сарын бэлгэлээ базаагаад явж л байна. Ойролцоогоор нэг сая төгрөг гарчихлаа. Дахиад ч нэг сая гаран төгрөг гарахаар байна.