Ц.Туваан сайд АДУУЧИН ДҮҮГЭЭ Засгийн газрын төлөөлөгчөөр томилжээ

-Ц.ТУВААН САЙД АА, ГАЗРЫН ТОСНЫ САЛБАР МОРЬ УЯХААС ӨӨР ШҮҮ-

БНХАУ-ын төрийн өмчит “Петрочайна дачин тамсаг” ХХК Монгол Улсын Засгийн газартай Бүтээгдэхүүн хуваах гэрээ байгуулан Дорнод аймгийн Матад, Халх гол сумдын нутагт газрын тосны үйл ажиллагаа явуулж буй. Тус компанийн эзэмшиж байгаа 19, 21-р талбайд Монголын талын эрх ашгийг хамгаалах, хяналт тавих маш чухал үүрэгтэй Засгийн газрын төлөөлөгч гэх албан тушаал бий. Тус албан тушаал нь Петрочайнагийн олборлолт, тээвэрлэлт, экспорт, өртөг нөхөгдөх зардалд хяналт тавих үүрэгтэй нарийн мэргэшил шаардсан ажил байдаг.

Гэтэл Алдарт уяач, Аж үйлдвэр, эрдэс баялгийн сайд Ц.Туваан өөрийнхөө адуучин дүүг газрын тосны 19-р талбайн Засгийн газрын төлөөлөгчөөр томилжээ.

Засгийн газрын төлөөлөгчөөр томилогдсон  адуучин залууг Ганболдын Ган-Од гэдэг. Тэрбээр Ц.Туваан сайдын адуу үржүүлгийн ажлыг хийдэг хуурай дүү нь аж.

Өмнө нь Засгийн газрын төлөөлөгч гэх энэ албан тушаалд дандаа шахааны хүмүүс томилогддог байсан нь нууц биш. Энэ удаа ч бас өөрчлөгдсөнгүй. “Петрочайна дачин тамсаг” ХХК-д хяналт тавих ёстой, Монголын талын эрх ашгийг хамгаалах ёстой энэ чухал албанд салбарын ямар ч ойлголтгүй, газрын тосны салбарт нэг жил ч ажиллаж байгаагүй хүмүүс томилогдон ажилласаар байна.