Сэлэнгээс бусад аймгийн Засаг дарга нарыг томилжээ

Аймаг, нийслэл, сум, дүүргийн ИТХ-ын сонгууль аравдугаар сарын 11-ний /2024.10.11/ өдөр орон даяар болсон. Түүнчлэн аймгууд Иргэдийн төлөөлөгчдийн анхдугаар хуралдаанаа хийж Засаг даргад нэр дэвшиж олонхийн санал авсан хүмүүсийнхээ нэрсийг Ерөнхий сайдад илгээн батламжлуулж дуусаад байна.

Улмаар 21 аймгаас 20 аймгийн Засаг дарга томилогдон ажлаа аваад байгаа бол Сэлэнгэ аймгийн Засаг дарга томилогдоогүй байгаа юм.

Тодруулбал Сэлэнгэ аймагт МАН 21, Ардчилсан нам 19, ХҮН нам нэг суудал авчээ. Орон нутгийн сонгуульд ялалт байгуулсан МАН-аас аймгийн ИТХ-ын төлөөлөгч А.Дашбатыг нэр дэвшүүлэх шийдвэр гаргасан аж. Аймгийн ИТХ-ын анхдугаар хуралдаанаар хариуцлагын гэрээнд гарын үсэг зурсан Засаг дарга Н.Лхагвадорж нь өөрийн нэрийг дэвшүүлэн Ардчилсан намын нэр дэвшигчидтэй үгсэн тохиролцох замаар тэдний саналыг авч ялалт байгуулсан аж. Тиймээс намын бодлого, шийдвэрийг сөрж нэр дэвшин Ардчилсан намын гишүүдийн дэмжлэгтэйгээр ялалт байгуулсан Н.Лхагвадоржийг Ерөнхий сайд Л.Оюун-Эрдэнэ батламжлаагүй байна.