Л.Оюун-Эрдэнэ: Сүүлийн 2-3 жил аавыгаа сонгох уу, ээжийгээ сонгох уу гэдэг шиг төвөгтэй нөхцөлд байлаа

УИХ-ын чуулганы өнөөдрийн (2025.03.28) нэгдсэн хуралдаанаар Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайлан болон Монгол Улсын хөгжлийн 2024 оны төлөвлөгөөний гүйцэтгэлийн тайланг хэлэлцэж байна.

Чуулганд Ерөнхий сайд Л.Оюун-Эрдэнэ оролцож байна. Энэ үеэр УИХ-ын гишүүн Д.Бум-Очир олон улсын хэвлэлд Монгол Улсыг ардчиллаас ухарч, автократ засаглалтай болж буй хэмээн бичсэн байгааг сануулж, асуулаа. 

Үүнд Ерөнхий сайд Л.Оюун-Эрдэнэ "Ардчиллын индексүүдийн хувьд зарим нь урагшилсан, зарим нь ухарсан байгаа. Мэдээж бидний хувьд нээлттэй ярих, ярихгүй гээд олон асуудалд парламентын гишүүд хамтдаа дүгнэлт хийх асуудал ч байна. Энэ талаар нягтлаад олон улсын байгууллагуудтай уулзахад манай хэд хэдэн индекс геополитикийн нөхцөл байдал асуудлууд дагуулсан. Манай улсын хувьд ОХУ, Украины нөхцөл байдалд түдгэлзсэн саналыг өгсөн. Тухайн цаг үед Энэтхэг ч тэр, манайх ч тэр ийм байр суурьтай байх нь зүйтэй гэж үндэсний аюулгүй байдал, Аюулгүй байдлын байнгын хороо болон бусад газруудад 3-4 удаа ч ярилцаж байсан. Б.Батцэцэг сайд энийг дэлгэрэнгүй тайлбарлах нь зүйтэй байх. Монгол Улс олон тулгуурт, энхийг эрхэмлэсэн гадаад бодлоготой. Гэхдээ манай улсын газарзүйн байршлын онцлог бас нөлөөлж байна. 

Сүүлийн 2-3 жил аавыгаа сонгох уу, ээжийгээ сонгох уу гэдэг шиг төвөгтэй нөхцөл байдал үүссэн. Үүнийг бид дотроо илэн далангүй ярих ёстой. 

Мэдээж биднээс өөрсдөөс маань хамаарах алдаа, оноонууд ч гарсан. Тийм учраас ер нь энэ индексүүдийг цогц байдлаар ямар аргачлалаар үнэлэх вэ, индексүүдийн талаар ойлголтоо хэрхэн цэгцлэх вэ гэдэг нь туйлын чухал.

Дэлхий дээр байгаа геополитикийн нөхцөл байдлыг харвал нэлээд хэмжээнд өөр дэлхийд амьдарч байна. Маш нухацтай, олон талаас нь ярилцаж, дүгнэлтээ дотооддоо нэг болгох шаардлага байгаа гэж бодож байна" хэмээн хэллээ.