АУДИТ: Хотын дарга Х.Нямбаатарын гаргасан бонд хугацаандаа төлөгдөхгүй байх эрсдэлтэй байна

Нийслэлийн Засаг даргын тамгын газраас 2024 онд 798 тэрбум төгрөгийн дотоод бонд, 500 сая ам.долларын гадаад бонд гаргасан. Ингэхдээ “Бөөрөлжүүтийн ДЦС-ыг барих төсөл”, “Батарей хуримтлуурын төсөл” болон Улаанбаатар хотын автозам, замын байгууламжийн засвар шинэчлэлийн  ажил” төслүүдийг санхүүжүүлэхэд 798 тэрбум төгрөг,  “Сэлбэ дэд төв”-ийн бүтээн байгуулалтыг санхүүжүүлэхэд 500 сая ам.доллар босгосон байна.

500 сая ам.долларын зээлийг хэрхэн төлөх нарийвчилсан судалгааг хийгээгүй байна

Нийслэлийн Засаг даргын тамгын газраас “Сэлбэ дэд төв”-ийг санхүүжүүлэх 500 сая ам.долларын гадаад бонд гаргахдаа зээлийн үндсэн болон хүүгийн төлбөрийг хэрхэн бүрдүүлэх талаар нарийвчилсан тооцоо судалгааг бодитой хийгээгүй байна гэж аудит дүгнэжээ.

Нийслэлээс бондын эргэн төлөлтийг  “Сэлбэ дэд төв”-ийн хүрээнд нийслэлийн хөрөнгө оруулалтаар баригдах 7328 айлын орон сууцаар 5 буудал, Хайлааст, Чингэлтэй орчмын 640 га газрыг сольж чөлөөснөөр нэг га газрыг дөрвөн тэрбум төгрөгөөр худалдан борлуулж 2.6 их наяд төгрөгийн орлого олох боломжтой гэж үзсэн байна.

Орон сууцны төв зам дагуу 7328 айлын орон сууцны үйлчилгээний зориулалттай 100 мянган м.кв талбайг 548.2 тэрбум төгрөгөөр, зарим орон сууцыг 3.7 тэрбум төгрөгөөр нийт 551.9 тэрбум төгрөгийн орлохоор тооцоо гаргасан байна. Гэвч ТЭЗҮ-ээс өөр нарийвчилсан тооцоо судалгаа байхгүй байгааг аудитын дүгнэлтэд дурджээ.

Дотоод гаргасан 798 тэрбум төгрөгийг татвар нэмж төлөхөөр тусгажээ

Нийслэлийн зам засвар арчилгаанд зарцуулах 200 тэрбум төгрөгийн бондын транч-1 нь нэг жилийн хугацаатай 15 хувийн хүүтэй 100 тэрбум, транч-2 нь хоёр жилийн хугацаатай 15 хувийн хүүтэй, 100 тэрбум төгрөг бөгөөд 2025-2026 онд эргэн төлөх хуваарьтай байна. Гэвч буцаах төлөх эх үүсвэрийг автозам ашигласны төлбөрийг тав дахин, АТБӨЯХ-ийн албан татварыг 1-3 дахин нэмэгдүүлэх замаар өрийн хүүгийн болон үндсэн төлбөрийг төлөхөөр тусгажээ.

Х.Нямбаатар Өрийн удирдлагын тухай хуулийг зөрчжээ

Нийслэлээс богино хугацаатай, арилжааны нөхцөлтэй дотоодын зах зээлээс 798 тэрбум төгрөг, гадаад зах зээлээс 500 сая ам.доллар татан төвлөрүүлсэн хөрөнгөөр зам засвар, арчилгаа, Бөөрөлжүүтийн ДЦС барих, Батарей хуримтлуурын станц барих, Сэлбэр дэд төвийг орон сууцжуулах зэрэг төсөл арга хэмжээг санхүүжүүлэхээр төлөвлөсөн нь Өрийн удирдлагын тухай хуулийн 6-р зүйлийн 6.4.2-д энэ хуульд өөрөөр заагаагүй бол арилжааны нөхцөлтэй гадаад зээллэгийн эх үүсвэрээр эргэн төлөгдөх чадвартай төсөл, арга хэмжээг санхүүжүүлэх, 6.4.3-д тухайн төсөл арга хэмжээний хэрэгжих хугацаа нь түүнийг санхүүжүүлэх зээллэгийн эргэн төлөх хугацаанаас илүүгүй байх чиглэл баримтлах, 6.4.4-д гадаад, дотоодын хөрөнгө оруулалтаар санхүүжүүлэх боломжтой төсөл, арга хэмжээг зээллэгийн хөрөнгөөр санхүүжүүлэхгүй байх чиглэл баримтлах гэснийг тус тус зөрчиж байна гэж аудитын байгууллага дүгнэжээ.

Ж.БАТ