Н.Номтойбаяр: "Цөмийн энергийн тухай хууль"-ийг зөв тайлбарлахгүй бол бид ДАРАМТАД ОРНО

УИХ-ын чуулганы өнөөдөр /2024.11.21/-ийн нэгдсэн хуралдаан болж байна.

Хуралдаанаар УИХ-ын гишүүн Н.Номтойбаяр "Өнөөдөр "Цөмийн энергийн тухай хууль"-ийн эцсийн хэлэлцүүлэг болж байна. Хэлэлцэх эсэхийг нь дэмжээд дуусчих асуудал биш. Ажлын зөвлөмж, чиглэлүүд гарна. Хуулийг батлахдаа, зүйл заалтыг нь хэлэлцэхдээ ямар ойлголтоор энэ хуулийг баталж байгаа юм. УИХ-ын гишүүдээс гарч байгаа санал санаачилгууд, анхааруулж хэлж байгаа маш олон зүйл байгаа. Энэ бүх португалыг нэгтгэж авч байгаад зөвлөмж, чиглэл гаргана. Оюу толгойн жишгээр явна гэсэн үг. 

Нэг зүйлийг гишүүдэд анхааруулж хэлмээр байна. Энэ нь нэг компани, гаднын байгууллагатай байгуулж байгаа гэрээ хэлцэлд зориулсан хууль биш. Нийтлэг байдлаараа л үйлчилнэ. Энийг цаашдаа анхааралтай ярихгүй бол гаднынхан ч гэсэн энэ чуулганыг үзэж байгаа шүү дээ. Синхроны орчуулгатай л үзэж байгаа байх.

"Монголчууд чинь эхлээд гэрээ хэлэлцээрийнхээ асуудлыг урьдчилж тохироод, түүнтэй нийцүүлээд хууль батлаад, дараа нь гэрээ нь орж ирээд явчихдаг юм байна" гэдэг маш буруу жишиг тогтоно. Дараа нь бид маш том шахалт, дарамтад орж эхэлнэ. Тэгэхээр энэ хандлагаа зөв тайлбарлаж ярихгүй бол буруу ойлголтыг өгөөд хөрш орнууд "Та нар ингэдэг биз дээ" гэдэг зарчим бариад байвал их өрөөсгөл зүйл шүү. Тэгэхээр хэдүүлээ үгэндээ анхаармаар байна. Ажлын хэсэг ч гэсэн энэ дээр хариулахдаа мэр сэр алдаад байна. Тэгэхээр энэ зөвхөн нэг компанид зориулсан хууль бол огт биш.