С.Эрдэнэболд: АН-ын даргыг аль нэг нам, мөнгө, явцуу ашиг сонирхол шийдэхгүй

Ардчилсан намын даргын сонгуультай холбоотойгоор намын Үндэсний бодлогын хорооны Дотоод сонгуулийн хорооноос мэдээлэл өгч байна. 

Дотоод сонгуулийн хорооны дарга С.Эрдэнэболд "Бид ардчилсан хувьсгалыг хуулаад 35 жил болж байна. Энэ хугацаанд Монгол Улс ардчиллын замаар эргэлт буцалтгүй замнаж байгаа. Гэсэн хэдий ч өнгөрсөн 35 жилийн ололт болсон олон эрх чөлөө хумигдсаар, иргэдийн нуруун дээр ачаалал дарамт болсоор байна. Энэ бол эрх чөлөөний эргэлтийг авчрах түүхэн цаг хугацаа гэж бид үзэж байна. 

Ардчилсан намын зүгээс наймдугаар сарын 28-нд төлөөллийн төв байгууллага болох ҮБХ-оо хуралдуулсан. Энэхүү хурлаар АН-ын удирдлага буюу дараагийн даргыг сонгох тухай асуудлыг хэлэлцэн шийдвэрлэсэн. Ингээд өнөөдөр 11:40 цагаас оройн 18:00 цаг хүртэлх хугацаанд АН-ын даргыг сонгох сонгуульд нэрээ дэвшүүлэх нэр дэвшигчдийг бүртгэж авахаар болсон. Намын даргыг сонгох журмын дагуу АН-ын даргыг сонгох сонгуулийг зохион байгуулахаар бид бэлтгэл ажлаа хангаж байна. 

Намын Үндсэн дүрэм болон намын даргыг сонгох журамд заасны дагуу ҮБХ-нд сонгуульт гишүүнээр дөрвөөс доошгүй жил ажилласан, АН-ын гишүүн намын даргад нэрээ дэвшүүлэх эрхтэй. Энэ шаардлагыг хангасан хүн холбогдох материалаа 18:00 цагаас өмнө авчрах ёстой. 

АН-ын даргыг сонгох сонгууль бол түүхэн хариуцлагатай, асар эгзэгтэй цаг үед болж байна. Улс төрийн сонгуульд 3 дараалан олонх болоогүй хүчний хувьд бид эв нэгдлээс институт гэсэн зарчмаар өнгөрсөн хугацаанд ажилласан. Дараа дараагийн улс төрийн сонгуульд иргэдийнхээ дэмжлэгийг авч, итгэлийг нь хүлээж, хүндэрсэн эдийн засагт сэргэлт авчрах улс төрийн хүчирхэг институт болохын төлөө бид ажиллана. Энэ багийг манлайлж, түүчээлж авч явах лидерийг сонгох сонгууль учир түүхэн хариуцлагатай гэж үзэж байгаа юм.

Наймдугаар сарын 31-нд ҮБХ үргэлжлүүлэн хуралдаж, сонгуулиа явуулахаар тов тогтсон. ҮБХ-ны хуралд нэр дэвшигчид өөрсдийн мөрийн хөтөлбөрийг танилцуулж, өрсөлдөнө. Ингээд ялалт байгуулсан нэр дэвшигчийг намын их хурлаар батламжилна. Олон нэр дэвшигч гарсан тохиолдолд 2, 3-р шатны өрсөлдөөн гарч болно. Тухайлбал, 5, 10 хүн нэр дэвшлээ гэхэд 10 хувиас доош санал авсан хүмүүс нь хасагдаад, үлдсэн нь дахин өрсөлдөх зохицуулалт бий" хэмээн хэллээ.

Үргэлжлүүлэн тэрбээр сэтгүүлчдийн асуултад хариуллаа.

 -АН-ын дараагийн даргыг эрх баригч намаас захиалчихсан гэдэг мэдээлэл гараад байна. Үүнд тайлбар өгөх үү?

-АН-ын даргыг ҮБХ-ны 390 гишүүн шийднэ. Түүнээс биш аль нэг нам, мөнгө, явцуу ашиг сонирхол шийдэхгүй. Нийгэмд янз бүрийн цуурхал явж байж болно. Угаас бид олны өмнө бүх зүйлээ нуухгүй ирсэн. Бид ямар нэгэн байдлаар бусдын явцуу ашиг сонирхолд өртөхгүй, саруул ухаант хүмүүсийн сонголтоор дараагийн даргаа сонгож чадна гэдэгт итгэж байна. Ачаа үүрээд, ард түмнийхээ амьдралыг сайжруулахын төлөө шударга зүтгэх аавын хүү, ээжийн охин намын дарга болох бүрэн боломжтой.