М.Нарантуяа-Нара: Хүн өөрт байгаагаа л өмсөөд явдаг, юугаа өмсөх нь хүний дур

Бүгд Найрамдах Улсаа тунхаглаж, анхдугаар Үндсэн хууль батлагдсаны 100 жилийн ойн өдөр УИХ-ын дарга болон УИХ-ын гишүүд жанжин Д.Сүхбаатарын хөшөөнд цэцэг өргөсөн. Энэ үеэр УИХ-ын гишүүн М.Нарантуяа-Нарагийн өмссөн хувцас шүүмжлэл дагуулаад буй.

Энэ талаар УИХ-ын гишүүн М.Нарантуяа-Нара "Хүн өөрт байгаагаа л өмсөөд явдаг бөгөөд ер нь юугаа өмсөх нь хүний дур юм.

Өмнөх Парламентанд эмэгтэй гишүүд өмссөн зүүснээрээ магтагдаж хийсэн бүтээснийхээ багаар дуудуулдаг байсан бол энэ парламентын эмэгтэй гишүүд тансаг үнэтэй хувцас хэрэглэлгүй эгэл байдлаараа эсвэл энгийн боловч тод байдлаараа шүүмжлүүлэх юм шиг байна.

Миний хувьд би урлагийн хүн биш байхаа больсон ч сонголт маань урлагтай үргэлж холбоотой байж ирсэн бөгөөд цаашид ч тийм байх болно! Энэ бол дотор минь оршдог зүйл юм.

Би хүмүүст элдвээрээ хэлэгдэхгүй гээд хага ташим хүйтэнд нимгэн нөмгөн явж өвдөж хавдаж ажлаас чөлөө хүссэний оронд байгаагаа өмсөөд дулаан явахыг илүүд үзнэ.

Өчигдөр өглөө Жанжин Сүхбаатарын хөшөөнд цэцэг өргөх ёслолоор хамгийн дулаан бөгөөд таарч байгаа нь энэ ягаан маань байв. Харин өнөөх жиргээний хүний алхам бүрийг мөшгиж алдаа бүрийг отож байдаг хэрүүлээр өлсөгчид ам уралдаж гэнэ.

Бид өмссөн зүүсэн гоё ганган уран яруугаараа биш хийж бүтээснээрээ хэлэгдэж яригдхыг илүүд үздэг эмэгтэйчүүд шинэ Парламентийн онцлог байгаа шүү.

Ер нь тэгээд гишүүд гэхээрээ тасарцан ганган амьтад байх ёстой гэж хаана ч заагаагүй байгаа.

Дэлхий ертөнц бүхэлдээ өөрчлөгдөж чиг хандлага хүртэл чөлөөлөгдөж задгайрч байхад өмсгөл зүүсгэлд л ач холбогдол өгдөг Монголчууд минь бас сэтгэлгээгээ тэлээсэй билээ" хэмээжээ.