Шинэ жил тэмдэглэх хаус дунджаар 1.5 сая төгрөгийн үнэтэй байна

Өвлийн цастай өдрүүд эхэллээ. Ингээд албан ёсоор шинэ жилийн уур амьсгал орж байна гэхэд хилсдэхгүй. Нийслэл хотын албан байгууллагууд гацуур модоо засахтай зэрэгцээд л анги хамт олон, найзуудын шинэ жил эхэлдэг. Ингэхдээ аль болох хотын захад олны хөлөөс зайдуу баярлахыг илүүд үздэг нь зүй. Түүнийгээ ч дагаад зуслангийн байшин, хаус, амралтын газрын түрээсийн үйлчилгээ идэвхэждэг.

Тэгвэл бид энэ удаад хотын эргэн тойрон буй шинэ жил тэмдэглэх боломжтой зуслангийн байшин, хаусны үнийг талаар дараах мэдээллийг бэлтгэлээ. Улаанбаатар хотын хойд хэсэг: Хадат, Хандгайт, Санзай, Шарга морьт, Жигжид, Сэлбэ гээд ой модоор хүрээлэгдсэн цэнгэг агаартай бүс. Та гэр бүл, найз нөхдийн хамт зорин очиход хамгийн ойрхон, хамгийн таатай хэсэг гэж болно.

Тухайн бүсэд зуслангийн хаус нэг хоногийн төлбөр багадаа 250 мянгаас 1 сая 500 мянган төгрөг, дунджаар 1.3 саяас 3 хүртэлх сая төгрөгийн үнэтэй байна. Энэ үнэд машины зогсоолоос эхлээд хэрэгцээт бүх л зүйл багтсан. Мөн 5-20 хүн хүлээн авах боломжтой газрууд юм.  Харин хотоос зайдуу Тэрэлж, Ар гүнт, Жаргалант гэх мэт газруудад жижиг хаус хоногийн 250 мянган төгрөгөөс эхэлж байна. Мөн Улаанбаатар хот дотор 2-4 өрөөтэй хаус түрээслэх үнэ 2-5 сая төгрөгийн орчим байна. Орчин зэрэглэлээс хамаарч 2-5 сая төгрөгийн хооронд хэлбэлзэж байгаа аж.