Чамгүй хугацаанд өрнөсөн эрх баригч намын үймээн шуугиан алсарч, Засгийн газар, төрийн зарим байгууллагуудад томилгоо хийж байна. Дээрээс нь дурдахад Шадар сайдаар ажиллаж байсан Н.Учралыг УИХ-ын даргаар томилсон учраас Эдийн засгийн хөгжлийн сайд бөгөөд Тэргүүн Шадар сайдаар Ж.Энхбаярыг, Хүнс, хөдөө аж ахуй, хөнгөн үйлдвэрийн сайдаар М.Бадамсүрэнг тус тус томилов. Харин эдгээр томилгооноос М.Бадамсүрэнг сайдаар томилсон нь олны анхаарлын төвд байна. Учир нь анх удаа УИХ-д сонгогдсон шинэхэн гишүүн. Нөгөө талаар элдэв бүлэг фракцгүй, улстөржөөд байдаггүй нэг нөхөр гэнэт сайдын суудалд очихоор анхаарч таарна.
Ямартай ч Ерөнхий сайд Г.Занданшатар байнга сайдын суудал дамжин нисэн бууж байдаг нөхдийг томилсонгүй, хэн нэгэн угсаа залгамжлагч цагаан захтныг томилоогүй нь олны таалалд нийцсэн биз. Үнэнийг хэлэхэд аймгийн Засаг даргаар ажиллаж байсан, ажил амьдралын хат суусан нөхрийг сонгосон нь нүдээ олсон томилгоо байв.
Мэдээж хэрэг, ах намыг хоёр хуваагдан үймж байхад Дэгийн тухай хууль санаачлан өргөн барихаас эхлээд өдгөөгийн Засгийн газрыг хамгаалахад манлайлан оролцсон гавьяа ч бас сайдын суудал руу түлхэхэд нөлөөлж таарна. Гэхдээ л нүдээ олсон томилгоо.
Шинэхэн сайд М.Бадамсүрэнгийн хувьд Дорнод аймаг дахь Нефть хангамжийн газрын түгээгч, эрхлэгчээр ажлынхаа гарааг эхлүүлж, 2009 он гэхэд аймгийн МАН-ын хорооны дэд даргаар их улс төрд хөл тавьсан нэгэн. Ийнхүү 2012 оноос МАН-ын хорооны дарга, 2014 он гэхэд аймгийн Засаг даргын орлогч, 2015 оноос 2024 он хүртэл аймгийн Засаг даргын алба хашиж байгаад УИХ-д сонгогдсон яах аргагүй л ажлын хүн. Тэр тусмаа хүнс, хөдөө аж ахуйн салбарыг аймаг орон нутаг удирдаж, ажил хийж үзсэн хүн л удирдана. Түүнээс хэн нэгэн цагаан захтан, онолчин авч явахад хэцүү салбар.
М.Бадамсүрэн Дорнод аймгийг хөгжлийн манлайд өргөж тавиагүй ч цаг үеийн шуурганд уруудуулаад туучихаагүй. Хүнээ хөгжүүлэхээс эхлээд хөрс сууриар нь хамгаалж ажилласан байдаг. Аймгийн хэмжээнд газар тариалан, бэлчээрийн болон фермерийн аж ахуйг хөгжүүлэх тал дээр бодлого төлөвлөн, чамгүй анхаарсан байдаг. Энэ бүх туршлага нь хүнс, хөдөө аж ахуйн салбарыг удирдахад ихээхэн тус дэм болно.
Мөн нэг зүйл бий. Аймгийн Засаг дарга нар тухайн орон нутагт үйл ажиллагаа явуулж байгаа уул уурхайн компаниудад гол төлөв найр тавьдаг. Бүр хэтэвч нэг дарга ч байдаг.
Харин М.Бадамсүрэн Дорнод аймагт үйл ажиллагаа явуулж байгаа “Петро чайна дачин тамсаг” компанид хууль ёсны шаардлага тавьж, ерөнхийдөө дайн зарлан, газрын гүний уснаас эхлээд цензур тавин ажилласан. Тэр ч бүү хэл "Петро чайна дачин тамсаг" компанийг Монгол Улсын хууль, тогтоомжийг ноцтой зөрчсөн гэж үзэж, хууль хяналтын байгууллагад шалгуулахаар өгөх зэргээр тэмцэл өрнүүлсээр УИХ-д ирсэн хүн.
Тэр орон нутагт үйл ажиллагаа явуулж байгаа уул уурхайн компаниудтай ашиг сонирхлоо нэгтгэнэ гэхээсээ илүүтэй тэдний аливаа ажилд аймгийнхаа хувийн хэвшлийг оруулж ажиллахад томоохон үүрэг гүйцэтгэсэн Засаг дарга. Тиймдээ ч “Газрын тосны үр өгөөж Монголчуудад мэдрэгдэхгүй байна. Байгаль орчинд сөрөг нөлөөтэй үйл ажиллагаа явуулж байна. Нутгийн иргэд байгалийн баялгийнхаа ашиг шимийг хүртэхгүй байна” гэх шүүмжлэлийг тавьж, газрын тосны талбайгаас хилийн боомт хүртэл хатуу хучилттай зам тавиагүйгээс олон салаа зам бий болж малын бэлчээр талхлалт, цөлжилт үүсэх нөхцөл шалтгаан болж байсан учраас 2017 онд газрын тосны тээвэрлэлтийг зогсоосон.
Үүний дараа Ашигт малтмал газрын тосны газар, “Петро чайна дачин тамсаг” компани, Дорнод аймгийн Засаг дарга гурав гэрээ хийсэн боловч гэрээнд тусгагдсан үүргээ тус компани биелүүлээгүй учраас 2018 онд дахин газрын тосны тээвэрлэлт ба гүний ус ашиглахыг зогсоосон. Аймгийн иргэдийн Төлөөлөгчдийн хурал, Засаг дарга нэг байр суурьтай байж, зөв зохистой замд нь оруулсан байдаг юм.
Тухайн үед Уул уурхай хүнд үйлдвэрийн яам, Ашигт малтмал, газрын тосны газар, Монголд суугаа БНХАУ-ын Элчин сайдын яам, үйлдвэрчний эвлэлийн хорооноос олон бичиг тоот ирүүлж байлаа. Харин М.Бадамсүрэн гаргасан шийдвэртээ хатуу зогсож 2018 оны аравдугаар сард Ашигт малтмал газрын тосны газар, Дорнод аймгийн Засаг дарга, “Петро чайна дачин тамсаг” компани гурван талт хэлэлцээрийн ширээний ард дахин суух хүртэл арга хэмжээ авч байж засмал замтай болгосон, гүний усыг зөв зохистой ашигладаг болгосон, байгаль орчинд ээлтэй болгосон гэх мэт гавьяа түүнд бий. Тэр “Петро чайна дачин тамсаг”-ийн халаасанд ороогүй шазруун эр.
Ямартай ч энэ мэт ажил хийж үзсэн, тэмцэж үзсэн нөхрийг Хүнс, хөдөө аж ахуй, хөнгөн үйлдвэрийн сайдаар томилсон нь Г.Занданшатарын хамгийн сайн томилгоо байв.
Их Мэдэгч
dobu
